Emîne Şenyaşara ke mêrde û 2 lajê ci hetê merdimanê Wekîlê AKPyî Îbrahîm Halîl Yildizî ra kişîyayî lajê xo Ferît Şenyaşarî reyde 197 rojî yo semedê edaletî nobete gêna.

Şenyaşaran vist vîrî ke 24ê êlule de roja îneyî çalakîya înan do bikewa roja 200. û ê do bi 200 avûkatan waştişanê xo bîyarê ziwan.

Emîne Şenyaşar vat: ''Tîya de ma rê zulm yeno kerdene, ma yenê destbend kerdene. Polîsî tim ma teqîb kenê. Wa hînî no zulm biqedo û edalet bêro caardene. Dozgeran berî ma rê qefilnayî, ma de pêvînayîşî nêkerdî. Wa roja îneyî pêro avûkatî tîya de bibê. Ma tîya de 2 kes ê, hewceyê ma pê paştdayîşê avûkatan esto. Wexto ke ma înan vînenê keyfê ma yeno.''