Heyetê Rayberdişî yê Merkezê Partîya Herêmanê Demokratîkan (DBP)  derheqê raporê wedaritişê destpanêdayîşê Hemsereka Pêroyî ya Partîye Salîha Aydenîz  merkezê xo yê pêroyî  de eşkerayîye çapemenîye kerde. Endam û îdarekaranê DBPyî ya pîya Hemsereka OHDyî ya Amedî Avûkate Ozume Vurgun tewrê eşkerayîye bîye.

Eşkerayîye hetê Hetkara Hemserekanê Pêroyî yê DBPyî Gulşene Sîncar ra ameye dayene. Sîncare bi yadkerdişê Dr. Ekrem Karakaya yo ke vizêr Konya de dînyaya xo bedilnaye û Avûkat Servet Bakirtaşî yo ke vizêr Îstanbul de dînyaya xo bedilnaye dest pê qiseykerdişî kerd.

Sîncare vist vîr ke 600 fezlekeyê ke ameyî meclîsî înan ra 300 hebî semedê wekîlanê HDPyî yê û vat: ''Derheqê Salîha Aydenîz de 78 fezlekeyî ameyî amadekerdene.  Aydenîze 5ê temmuze derheqê nê fezlekeyande pawitişê xo kerd. Rixmo ke aye bi pawitişê xo pê belge û vîdeoyan kerdo komîsyonê mutabakatî qoş pa nêkuwayo û qerarê wedarnayîşê destpanêdayîşî girewto. Yeno waştene ke bi wedaritişê destpanêdayîşî prosesê tepiştişî bidê destpêkerdene. Xora no vera Leyla Guven, Musa Farisogullari û Semra Guzel amebi kerdene.''

Sîncare vat: ''Ma do vera nê zextan têkoşînê xo bidomnê. Meclîso ke îradeyê şarî temsîl keno vera na neheqîye bêveng o. Ma nê şermezar kenê. No qerar huqûqî nê sîyasî yo. Ma zanê ke bi nê zextan kenê ke verê sîyasetê ma yê demokratîkî bigêrê.  Ma sey sîyasetmedaran ê demokratîkan û cinîyan bi hêzê ke heqdarîya xo ra genê ma do têkoşînî rê dewam bikerê. AKP zî do sey partîyanê bînan ê ke secîye fikiryenê, vîn bibo.  Ma do têkoşînê xo xurtêr bikerê û estbîyayîşê xo bidomnê. Ma do serbikewê.''