Sereka Parlamentoyê Frankofonî yê Brukselî Julie De Groote, ke roja Pancşeme wayîrîya keyeyî konferansêka serê trajedîyê cinîyan ê  Êzîdî kerde, derheqê grevê vêşanîye yê ke rayberîya parlamentera HDP'yî Leyla Guvene de dest pêkerdo de ANF’yî rê qisey kerd.

GANÎ BIAGÊRÊ HIŞÊKO KOLEKTÎF

De Groote vat, “Persêko giran o, bale anceno serê xemsarîya ma." De Groote ard ziwan ke, ganî her çîyî ra ver baş bêro famkerdene ke mesajê înan çi yê û vat, “Çunke vanê, heta şîyayîşê nuqtaya peyênê ê amade yê”. De Groote wina dewam kerd; “Beno ke yeno vatene ‘ma eynî cimatî ra nîyê coka ma eleqedar nêkeno’ Konferansê Êzîdîyan ê ewroyê (Pancşeme) parlamentoyî nîşanê ma da ke hişê merdiman şexsî nîyo. Ganî kolektîf bo.

Konferans de derheqê trajedîyê cinayan ê Êzîdîyan de temsîlkarê rêxistinanê cimatî yê sîvîlî, tarîxnasî, huqûqnasî û di cînîyanê  Êzîdîyan qiseykerdîbî. De Groote û parlamenter Viviane Teitelbaum konferansî ra dima ANF’yî rê qisey kerdibi û vatbi, seba naskerdişê qetilkerdişê Êzîdîyan ê do parlamento de xebatan bikerê.

CESARETÊKO GIRD O

De Groote ard ziwan ke çalakîyê grevê vêşanîye ganî biagêrê hişêko kolektîf û vat, "Seba ke vîrêk biagêrayo çalakîyêk, ganî kolektîf bo.  Ma tewrêci bibê, tewrê ci nêbê zî, waştişê nê cinîyan ganî bêrê heşnayene.” De Groote vat, “Babeta grevê vêşanîye de ma vînenê ke cesaretêko gird esto û wina dewam kerd: “ Eynî wext de merdim rehet nêkeno. Seba ke cuya xo vîndî nêkerê ganî ma çîyêk bikerê. Ganî medya na babete bikera rojdemê mîyanneteweyî. Nêbo kesêk do nêvîneno û kesêk hîsger nêbeno.”

SEBA DÎYALOG BÊRO KERDENE GANÎ DI KESÎ BIBÊ

De Groote ard ziwan, seba ke Tirkîya de rayîrê dîyalogî abo, verê her çîyî ganî seba dîyalogî di hetî bibê û na babete de vat, “Seba ke dîyalog bêro kerdene ganî di kesî bibê. Hetê etîmolojîkî ra na çekuya dîyalogî, estbîyayîşê di kesan ferz kena.”