Hetkarê Hemserekanê HDPyî Umît Dedeyî derheqê dewaya qefilnayîşî de merkezê partî de kombîyayîşê çapemenîye kerd û derheqê prosesê huqûqî de qisey kerd.

Dedeyî da zanayene ke hetê Mehkemeya Qanûnê Bingeyî ra mutala vizêr resayo înan û vat:'' Gama ke çew ewnîyeno mutala ra eke xebera çewî dewa ra çînêbo çew vano qey dewaya qefilnayîşê PKKyî ya. Her hetî ra eşkera eseno ke na dewayêka sîyasî ya. Mutala pê vatişanê îtîrafkaran ameyo amadekerdene ke nê heme bi tewirêkê bêhuqûqîye ameyî kerdene. Sey îdîanameyî mutala de zî yeno vînayene ke dozger senî aciz o bêhuqûqîye keno.

Naye ra qerarê qefilnayîşê HDPyî nêvejîyeno. Ez tîya ra veng dana AKPyî hem dewaya Kobanê hem zî na dewa de çala AKPyî yena kendene. Falîyetê wextê prosesê haştîye têna hetê HDPyî ra nêameyî kerdene. No proses bi tewrbîyayîşê burokrasîya leşkerî û sîvîle ya hetê Erdogan û MÎTî ra ame rayraberdene. Eke no peroses beno sebebê muhakemekerdişî tîya HDP têna nîyo. Demê haştîye beno sebebê muhakeme ke wa hînî çew vera şîdetî haştîye mewazo.

Ma roja verêne ra vanê ke na dewa  huqûqî nîya sîyasî ya. Îqtdar wazeno verê HDPyo ke muxalefeto tewr pîl  ê vera înan o bîgêro. Ekîbê ma yo xurt ê avûkatan û pawitişê ma yo zixm esto. Paştîya ma ma ra pêt a. Ma wazenê pîya bi heme komel û şarê xo pawitişê na dewa bikerê. Coka ke ma veng danê pêroyê hetan ke heta nika kişta ma de yê wa paştî bidê pawitişê HDPyî.''