Heyetê Pawitişê Munzurî yê Federasyonê Komeleyanê Dêrsimî (DEDEF)  derheqê şewatê Dêrsimî yo ke bi rojan o dewam keno de Kadikoyê Îstanbulî de eşkerayîye daye.

Eşkerayîye semedê kesan û heme ganîyan ê ke şewat de merdî bi rêzgirewtişî ameye destpêkerdene. Eşkerayîye hetê  Serekê Komeleya Dêrsimijan ê Kocaelî Ruhî Çelîkî ameye wendene.

Çelekî vist vîrî ke xeylêk cayanê welatî de şewatî dewam kenê û vat: ''Xoza bi rijyayîşî rî bi rî ya. Des hezaran kesî cayê xo ra tehlîye bîyî 9 hemwelatîyan zî cuya xo vînî kerde. Pê destê qeyûman THK ame bêtesîrkerdene û îdarekarê dewlete paştî nêdanê îdareyanê cayîyan. Rîyê nînan ra zî şewatî rê kêm ya zî erey mudaxale yeno kerdene. Reyna tay cayan de şar wazeno şewatî hewna bikero la hêzê dewlete destûrê înan nêdanê. Çîyo winayên nêno qebulkerdene. 

Hetê bînî ra zî bi bahaneyê şewatan hêrişê nîjadperestî zêdîyenê. Ma nê tewirê nîjadperestî red kenê. Ganî derheqê şewatan de koordînasyon bêro amadekerdene û semedê vindarnayîşê şewatan têbigêro. Reyna badê şewatan zî taxrîbatan tesbît bikero. Îqtîdar genî kêmîyan bivîno û verê şewatanê neweyan bigîro. Aladagan ra  heta Munzurî, Koyê Cûdîyî ra heta Kaçkarlarî xozaya ma semedê rantî  çîn kenê. Her cayê welatî de hemwelatîyî vera nayî vejîyenê.  No welat bêwayîr nêyo.''