Nuştox û Îlahîyatnas Îhsan Elîaçikî derheqê turê diyînî yê weçînayîşê serekkomarîye yê 28ê gulane de ANFyî rê qisey kerd.

Îhsan Elîaçikî îfade kerd ke îqtîdarê AKP-MHPyî weçînayîşanê 14ê gulane de dek û dolabê giranî kerdê û vat: ''Netîceyanê weçînayîşanê 14ê gulane pêro şîrketê anketan, sosyolog û zanistî şaş kerdî. Muxalefet hende bihêz nîyo ke kayanê îqtîdarî vejo werte. Tîya de rewşêka krîmînale est a û pêro hetê dewlete tede yê. Goreyê zêdîyayîşê nufusî 6 mîlyon weçînitoxî zêde nusîyayê, çew zî nêeşkeno ney îzeh bikero. Mi çimî de netîceyê weçînayîşê 14ê gulane goreyê şîrketanê anketî bîyê. Yeno vatene ke pêlê nîjadperestîye zêdîyayo la no hende pîl nîyo. Goreyê 2018î rayê partîyanê nîjadperestan kêmîyayê.''

Elîaçikî dîyar kerd ke hişmendîya dînî ya AKPyî û mutefîqanê ci nêeşkena asaya dînî ya serranê 70an derbaz bikera û vat: ''AKP, HUDA PAR û terîqatî est ê ke zaf peyê averşîyayîşê Îslamî de mendê.''

Elîaçikî ard ziwan ke namzedîya Kemal Kiliçdarogluyî seba serekkomarîye birêka raşte bîya û vat: ''Kiliçdaroglu û mutefîqê ci nêeşkayî verê dek û dolaban bigêrê. Rewşêka krîmînale est a û ganî Kiliçdaroglu heqê ney ra bêro. Eke muxalefet turê diyînî de vejîyo merdan û verê dek û dolaban bigêro Kemal Kiliçdaroglu do ser bikewo.''