HDPyî Kampanyaya 'Her kesî rê edalet'  ya ke do heta menda hezîrane dewam bikero, daye destpêkerdene. Kombîyayîşê nasdayîşê kampanya de Hemserekanê HDPyî Pervîne Buldan û Mîthat Sancarî metnê deklarasyonî yê kampanya wend.

Deklarasyon ra tay nuqtayê muhîmî wina yê:

''Îqtîtîdarê AKP-MHPyî welat her hetî ra fînayo mîyanê krîzê xorî. Nêtîcaya krîzî de bêedaletîye ya pîlî yena ciwîyayene. Yew komel têna pê edaletî eşkeno bibo. Eke edalet çînêbo welat rijîyeno. Problemo tewr pîl ê Tirkîya ewro bêedaletîye ya.  Hukmî ra heta heqê cinîyan, heqê domana ra heta heqê heywanan, heqê haştîye ra heta heqê cuye, heqê awe û herre ra heta heqanê ekolîjîkan her war de bêedaletîye esta. Îqtîdar dişmenê edalet û cigêrayoxanê edaletî yo.

Polîtîkaya hukmatî ya xelete zengînî hîna kerdî zengîn, feqîrî zî zafêr kerdî feqîr. Kedkarî arêqê çarî rişnenî la nêeşkenê nanêk bêrê keyeyê xo. Pê HKHyan bi se hezaran kesî bêkar verdayî û mergê komelkî rê caverdayî. Xora janê Korona zî na bêedaletîye pîlêr kerde. Kedkarî keyeyan rê heps bîyî, bi mîlyona karkerî karî înan ra ameyî eştene, û bi se hezaran esnafan îflas kerd. Hetê bînî ra çimeyê rayapêroyîye panc grûbanê paştgêranê Qesrê rê herikîyenê.

Îqtîdar sey dizdîya sîyasîyî  qeyûm vist dewre û cehd keno ke heme waran pê mekanîzmaya şîdetî îdare bikero. Xora humk pê destê hukmatî helisya. Bêhuqûqîye tewr pîlî bi destê dozger û dadgeran bîyî ke ê pê talîmatê Qesre têgêrenê. 2015î ra nata vera HDPyî û şarê kurdî dişmenîya pîle yena kerdene. Mehkemeya Heqanê Mediman a Ewropa zî na bêhuqûqîye dîye û qerar da ke Hemserekê ma yo verên Selahattîn Demîrtaş sey rehîneyê sîyasîyî yeno tepiştene û waşt ke wa bêro veradayene la îqtîdarî no qerar nêard ca.

Waştişê tewr bingeyî yê sey heqê kultur, nasname, ziwanê dayîke de perwerde û xo azadîfakerdişî yê kurdan ameyî xespkerdene û waştişê înan sey sûcî yeno vînayene. Pê huqûq û qeyûmî heqanê şarê kurdî xesp kenê. Bitaybetî elewîyî hedefê hêrişan de yê. Cenxaneyî bêstatu yenê verdayene û waştişê înan ê heqdarî nînê caardene. Hetê bînî ra qeyûmê vera kurdan resa muxalîfanê rojhelatê Tirkîya zî. Şexsê wendaranê Unîversîteya Bogaziçi de wazenê ke verê heme wendekaranê muxalîfan bîgirê.

Xora zîndanan de heme heqê tepişteyan bi hewayêkê sîstematkîkî yenê binpaykerdene. Vara birêz Ocalanî û tepişteyanê bînan ê Îmraliyî tecîrd yeno kerdene. Raporê CPTyî de zî no ame tesdîqkerdene. Vera na neheqîye 74 rojî yo zîndanan de grevê vêşanîye yeno kerdene. Reyna cigêrayîşo zit sey çîyê normalî yeno kerdene. Seredê ciwanê HDPyî vera ciwanan zî polîtîkaya hêrişkare yena rayraberdene. Seba ke qetilkar û tecawuzkarî hetê hukmatî ra yenê pawitene, Şîdetê vera cinîyan her roje zafêr beno. Nê zî qîm nêkerd hukmat wazeno ke morê xo binê Pêkerdişê Îstanbulî ra bianco. Nayî rewşê hîna xirabêr kerde. Waranê weşî û perwerdeyî de bêadaletîye merheleya tewer corên de ya. Bêedaletîye tewr pîl zî xoza rê yena kerdene ke her roje yena çînkerdene. Îqtîdar çend vînano ke vînî keno zafêr beno hêrişkar. La na rewşe wina nêeşkena dewam bikera. Ganî heme kesê edalet wazenê vera nayî bibê yew û vajî hînî bes o.

Ma do bibê vengê cigêrayîşê komelî. Ma do heme meseleyanê  welatî bikerê merkezê têkoşînê xo yê sîyasî û komelkîyî.

- Ma do vera bêkarîye, feqîrîye, vayîye, talanî  û neheqîye têkoşînî pîlêr bikerê.

- Ma do vera ziwanê şîdet û neferetî, vera polîtîkaya şarancêserfînayîşî xover bidê.

- Ma do têkoşînê xo yê semedê heq û huqûqê  şaranê û bawerîyanê cîya cîyayan qerardar rayra ber ke  şarî kultur, nasname û ziwanê dayike yê xo azad bişuxulnê.

- Ma do vera şîdet û qirkerdişê vera cinîyan xoverdayîşê xo pîlêr bikerê û hîna zaf wayîrê Pêkerdişê Îstanbulî bivejîyê.

- Ma do vera heme polîtîkayanê hêrişkaran ê vera ciwanan vejîyê.

- Ma do qirkerdiş û texrîbatê vera xoza vindarnê.

- Ma do heqê sîyasetkerdişî yê heme hezanê muxalîfanê komelkî û demokratîkan bipawê.

- Ma do bikerê ke qerarê Mehkemeya Heqanê Merdiman a Ewropa yê sey derehqê Demîrtaş, Kavala û Berberogluyî bêrê ca.

- Ma do peynîya şîdet, zordarîye, tecrîd û xespkerdişê heqanê ê zîndanan bîyarê.

Semedê caardişê edaletê komelkî  ma ewro dest pê kampanya kenê ke do 4 mengî heta hezîrana 2021î dewam biekro.

Ma  do pîya bi cinîyan, karkeran, kedkaran, esnafan, ciwana, dewijan, citkaran, astengdaran, heme şarê ke heqê înana ê ê ziwanê dayîke, heqê îdarekerdişî û heqê kultur, nasname û bawerîye yenê binpaykerdene, bêrê têhet û kuçe, meydan, waranê sanal û raştan de kombîyayîşan  û aktîvîteyan do bikerê. Hedefê ma oyo ke vera faşîzmê îqtîdarî heme hêzanê muxalîf û demokratîkan  bîyarê yew ca û têkoşînê hemkarî bidê rayraberdene.

Sere de muxalefeto sîyasî ma venga heme muxalefetê komelkî û yew bi yew hemwaltîyanê xo danê ke hema ke zaf erey nêbîyo ma pêro pîya biqîrê vajê semedê her kesî edalet. Ronayîşê welatê seypê û adîlî destê ma de yo. Ma veng danê ke heme muxalefeto demokratîk yê Tirkîya û heme merdimê biwîjdanî vera nê rejîmê bêedalet û bêheqî ma hêzê xo bikerê yew û têkoşînê hemparî pîlêr bikerê.''