Salona Kongre ya Lutfu Kirdarî ya Îstanbulî de DEM Partî beyannameyê xo yê seba weçînayîşê Şaredarîya Îstanbulî eşkera kerd. Namzedê şaredarîyanê qezayan û namzedê Şaredarîya Îstanbulî yê DEM Partî Merale Daniş Beştaş û Murat Çepnî zî tewrê kongre bîyî.

Çepnî û Beştaşe beyannameyê bi sernameyê ''DEM DEMê Îstanbulî yo'' eşkera kerd.

Beyanname de bi kilmî nê armanc û planî ameyî rêzkerdene:

''-Ma do verê rantî bigêrê. Goreyê sermaye ney goreyê îhtîyacanê şarî ma do Îstanbulî bivurnê. Îstanbul do hetê kedkaran ra bêro îdarekerdene.

-Îstanbul şaristanê cinîyan o. Şaredarîya ma de cinîyî do qeraran bidê û şaristanî îdare bikerê. 

-Ma do sîstemê hemserekîye û temsîlîya têdûşte her warê şaredarîye de bîyarê ca. 

-Şarê nê şaristanî do biranê serê şaristanî bidê. Ma do pêro dezgeh û rêxistinan zî tewrê îdareyî bikerê û demokrasîyê raştikênî bîyarê ca. Ma meclîsanê ciwan û cinîyan, foruman destek bikerê û aver berê. 

-Ma do vera xizanîye û cîyakerîye têkoşîn bikerê. Îdareyê herêmîyî, xebatanê cinî û ciwanan, ekolojî bihêz bikerê. 

-Ma do peynîya xespê qeyûman bîyarê.

-Ma do pêro ziwan, kultu, bawerî û etnîsîteyan bipawê û şaristanî bikerê şaristanê haştîye.   

-Ma do Kadikoy de Kitabxaneyê Celadet Alî Bedîrxanî; Şîşlî de Muzeyê Hrant Dînkî, Sancaktepe de  Merkezê Kultur û Hunerî yê Kazim Koyuncu û Esenyurt de Parka Ehmedê Xanî abikerê. 

-Sere de kurdkî pêro ziwanan de ma do xizmet bidê. 

-Ma do pêro îbadetxaneyan bipawê û restore bikerê. 

-Ma do vera şîdetê serê cinîyan bi xurtî têkoşîn bikerê. Ma do destkewteyanê cinîyan bipawê û  xebatanê serê têdûştîya cînsîyetan bikerê. 

-Ma do verê afatanê xoza goreyê plananê xo têbigêrê û merkezanê koordînasyonî awan bikerê.  Ma do vera erdlerzî tedbîran bigêrê û 'herinda ci de viraştiş'î esas bikerê. 

-Ma do bi hawayêkê beleşî xizmetê mendişî bidê û zerrîwazan û selahîyetdaranê şaredarîye ra yewinanê erdlerzî awan bikerê. 

-Ma do meseleya resayî ya Îstanbulî bi projeyanê xo yê metroyan çareser bikerê. Ma do otoparkan înşa bikerê. 

 -Ma do destek bidê keyeyanê xizanan.

 -Ma do budçeya şaredarîye seba xizmetan bişuxilnê û budçeya xo de krîterê têdûştîya cînsîyetan esas bikerê. ''