Vervatoxa DEM Partî Ayşegule Dogan merkezê partîye de kombîyayîşê çapemenîye serûber kerd û rojdem ercna.

Ayşegule bale ante weçînayîşanê Curnê Reşî yê 2yê hezîrane ser û vat: ''Ma startê xebatanê weçînayîşî da. 31ê adare de Curnê Reş de merdimanê namzedê AKPyî pusulayê rayan vêşnabî. Rixmê ney zî DEM Partî qeza de ser kewtbi. La YSKyî bire daye ke wa weçînayîş ancî bêro kerdene. Ma do ancî Curnê Reş de ser bikewê. Ma venga şarê xo danê ke wayîrê sindoqan vejîyo.''

Ayşegule Dogan vist vîrî ke vera bînaya DEM Partî ya Bêrecûkî di reyî hêriş ameyo kerdene û vat: ''Êyê ke verê xespê îradeyê Curnê Reşî de bêveng ê verê nê hêrişan de zî bêveng ê. Êyê ke bêveng ê mesuldarê nê serebûtan ê.''

Ayşegule Dogan ard ziwan ke nîqaşê serê Qanûnê Bingeyî yê neweyî dewam kenê û vat: ''Qanûno Bingeyî teyna sivîl ney ganî newe û demokratîk zî bibo. Qanûno Bingeyî ganî pêkerdişê komelî ser o bêro vitaştene. Partîya ma zaf girîngîye dana na babete.''

Ayşegule Dogan da zanayene ke 16ê gulane de roniştişê bire yê Dewaya Kobanê est o û vat: ''Bira na dewaya dafike zaf girîng a. Ma venga rayaumûmîye danê ke na babete de wa hîsger biba. Bira na dewa do bimojna ke seba Qanûnê Bingeyî yê neweyî ganî ê verênî ra fek vera bêro dayene.

Sîyaset de normalîzebîyayîş û nermbîyayîş û nîqaşê serê nînan rojdemê ma yo zî. La heta ke şarê bindestî û nasnameyê bînî çin bihesîyê Tirkîya de normalîzebîyayîş yan zî nermbîyayîş do nêqewimîyê.''