Heyetê Merkezê Rayberdişî yê DEM Partî derheqê nîqaşanê serê namzedîya Şaredarîya Îstanbulî de eşkerayîyêke daye.

Eşkerayîye wina ya:

''Derheqê namzedîya Şaredarîya Îstanbulî de nîqaşî est ê. Na çarçewe de partîya ma zî Îstanbul bi hawayêkê taybetî kerd babeta xo û nîqaşê hîrayî kerdî.

Nîqaşanê rayaumûmîye de nameyê Başake Demîrtaş vejîya vernî. Bêguman desteko ke Birêze Başake Demîrtaş dayo ma hêzêko pîl da ma. Başake Demîrtaş bi beyanê xo yê seba namzedîya Şaredarîya Îstanbulî paştî daye polîtîkayanê ma yê weçînayîşan zî. Ma destpêkê nê beyanî ra nata Birêze Başake Demîrtaş de mîyanê têkilîyan de yê. Ma pêro qewimîyayîşî ercnayî. Ma Başake Demîrtaş de roniştî û ma tede pêkerd ke a nêba namzeda Şaredarîya Îstanbulî.

Ma do rojanê verê ma de namzedanê xo yê seba Şaredarîya Îstanbulî rayaumûmîye de pare bikerê. Ma Başake Demîrtaş rê seba destekê ci sipas kenê û zanenê ke destekê ci do prosesê verê ma de dewam bikero.''

Başake Demîrtaş zî derheqê babete de eşkerayîyêke daye û vat: ''Ma partîya xo reyde pîya bire daye ke ez nêba namzeda Şaredarîya Îstanbulî. Wa şarê ma û weçînitoxê ma bizanê ke ma na bire bi hawayêkê koordîneyî û pêkerdişî girewte. Namzedê ke partîya ma do eşkera bikera, do bibê namzedê ma yê pêroyînan. Ma do bi pêro hêzê xo hetê nê embazanê xo de vinderê û seba serkewtişê partîya xo bixebitê.''