Heyetê Merkezê Ryaberdişî yê DEM Partî seba ke Şaredarîya Colemêrgî ameye xespkerdene merkezê pêroyî yê partîya xo de kombîyayîş kerd. Serekwekîla Koma Meclîsî ya DEM Partî Gulîstane Kiliç Koçyigit derheqê kombîyayîşî de kombîyayîşê çapemenîye kerd.

Gulîstane Kiliç Koçyigit qerarê cakerdişê qeyûmî sey qerarêkê sîyasî nema kerd û vat: ''Îqtîdar bi darbeyê vera demokrasîyî sûcê girdî keno. No îqtîdar çiwext biwazo weçînayîş keno, çiwext biwazo qeyûman ca keno.Îqtîdaro wînayên Tirkîya îdare keno. La îqtîdar hesabê yew çîyî nêkeno, no şar xoverdayox o, milê xo çewt nêkeno. Şarê kurdî weçînayîşan de qeyûmî ritî eştî çopan.  Şarê ma senî ke Wan de vera xespêkerdişê îradeyî werişt payan ser do nika zî werzo payan ser. Qeyûmo ke  dişmenê kurdan o rewna îflas kerdo. No darbe vera ma pêrune ame kerdene. Coka ganî ma pêro pîya ver ci vejîyê.

Ma qerar girewt ke ma do verê heme şaredarîyanê xo de çalakîyanê nobete bîdê destpêkerdene. Ma veng danê heme şarê xo, rêxistinanê komelê sîvîlî û her kesê wayîrê wîjdanî ke wa paştî bidê çalakîyanê ma. Hemsereka (Hatimogullari) seba ke ewro Îstanbul de programê ci est o a do siba şiro Colemêrg. Hemşaredarê Pêroyî yê DBPyî Keskîn Bayindir û Çîgdeme Kiliçgun Uçar zî bi heyetêkî verê xo da Colemêrgî.''