Hemsereka KCD’yî û parlamentera HDP’yî Leyla Guvene, seba tecrîdkerdişê serê Rayberê Şarê Kurdî Abdullah Ocalanî bêro wedaritene 83 rojî yo ke grevê vêşanîye yê bêdem û bêagêrayîşî de ya.

Rewşa weşîya Guvene her ke şona bena girane. Heyetê Odeya Tebîban a Amedî (DTO) kontrolanê rûtîn ê weşîya Guvene kenê. Serekê DTO'yî Mehmet Şerîf Demîrî ard ziwan ke, semedê ters û qesawetê şarî yê seba rewşa weşîya Leyla Guvene înan heyetêk kerdo amede. Demîrî vat, semedê waştişê avûkatan, seba tespîtkerdişê tesîrê ke grevê vêşanîye de weşîya Guvene de vejîyayê meydan û  kontrolkerdişê rewşa aye, yew heyatê pisporî dest bi xebatî kerd. La seba ke Guvene bêhal a û xo baş hîs nêkena nêeşkeyê kontrolê weşîya aye bikerê. Demîrî vat ke bêhal a, madeyê aye ameyo girewtene, ge-ge nêeşkena awe zî bişima û zaf kîlo kerdo vîndî.

Demirî ard ziwan ke, seba tedawîkerdişê Guvene no heyet rojanê verê ma de do defêna bişoro serdena Guvene.