Hemserekê pêroyî yê HDPyî yo rehîngirewte Selahattîn Demîrtaşî derheqê xoverdayîşê Leyla Guvene de rojnameyê Yenî Yaşamî rê nûşt.

'GANÎ MA WINA BIKERÊ KE ÇALAKÎYA GUVENE NETÎCE BIGÎRO'

Serê rêzanê nûşteyê Demîrtaşî wina yê: “Birêze Leyla Guvene 54 rojî yê ke grevê vêşanîye de ya. Rixmo ke sey parlamentere amîya weçînitine Amed de zîndan de yena tepiştene û bi waştişêkê meşruyî bedenê xo dayo vêşanîye ser.

Birêze Leyla Guvene seba birêz Ocalanî serkêşîya vengdayîşêkê xeylî manîdarî kena. Tewirê Guvene tewirêko birûmet û birêz o. Çîyo ke keweno ma mil no yo ke ma peyê waştişê aye de bi hawayêkê biqerarî vinderê.

Eke hende çîyêko muhîm hewna nêresayo rayapêroyîye ya neteweyî û mîyanneteweyîye sebebê nê zext, zor û ambargoyê hukmetî yê.

GANÎ ÇI BÊRO KERDENE?

Birêz Ocalanî bi nizdbîyayîşanê xo yê aşitîperweran û pêşnîyarîyanê xo yê maqulan heta dereceyêk bawerîya cimatê Tirkîya qezenc kerdebî. La seba ke prosesî ameyî xirakerdene nê ameyî vîrrakerdene. Ewro çîyo ke keweno milê ma, komelanê sivîlan, çapemenî û şarê ma bi ziwanêkê munasibî reyna qalkerdişê nê Tirkîya û dinya rê yo.

Yanî ganî ma qal bikerê ke waştişê Guvene çira muhîm o û tena meseleyê aye nêyo. Seba nê kampanyayê bidetayî û plankerdişî ameyêne kerdene la nê dewrî de ganî ma hîna bicidîyet nizdê nê meseleyî bibê. Ganî ma sey heyet bê ke cîyatî bikerê îdarekaranê weşanî, nûştoxan, programkaranê televîzyonî, sendîkayan, partîyan, odeyanê meslekî û Komelanê Sivîlan zîyaret bikerê û muhîmîya nê seba Tirkîya qal bikerê. Rayapêroyî ganî bi kombîyayîşanê şarî, panel û konferansan bêro hayîdarkerdene.

Seba ke çîyê verênî bêrê vîrardene rapor û broşurî eşkenê bêrê hadrekerdene. Yan zî bi vîdeoyanê kilmekan medyaya sosyale de ê çîyî eşkenê bêrê vîrardene.  

'OPSÎYONO TEWR RAST OCALAN O'

Hemverê vatişê îqtîdarê AKP-MHPyî yê Sûrîye û Rojava de bê mudaxele û şerî rayîrêk çinyo de ganî ma bi vengêkê berzî vajê 'Nê, yewna opsîyon esto. Hem zî opsîyono tewr maqul, tewr rast o. O zî birêz Ocalan o.' Birêz Ocalanî verî ra nê îhtîmalî dîyêne û naye ra aşitîya Tirk-Kurdan û yewîya stratejîke pêşnîyar kerdêne. Eke înan goş bidayêne pêşnîyarîyanê êyê maqulan ne zere de ne zî teber de hende dej nêancîyayêne.

Eke ma pawe bê ke zihnîyetê Erdogan-Bahçelî manewrayêka hîraye ya polîtîke bikerê ma do xo bixapênê. La seba ke nê di kesî nêwazenê ganî ma opsîyonê aşitî yê Ocalanî çinê nêhesibnê.

'BÊ OCALANÎ NÊBENO, NUQTE!'

O wext nika tam wextê ci yo. Ganî ma veng bidê vengê Leyla û bingeyêkê rastî de sîyaset bikerê. Birêz Ocalan meseleyê huqûqê ceza nêyo, meseleyê sîyasetî yo. Hêzê Ocalanî yê sîyasîyî qasê ma dewlete zî û hukmat zî zano. Xora naye ra yeno tecrîdkerdene.

Peynî de ma eşkenê vajê ke çira Ocalan, çira yewna kes nê? Înan ra nê vajê: Kesê aşitî anê mîyanê prosesê tarîxî de vejênê vernî û aver şinê, viraşte nêyê. Viraştişê alternatîfan ê nê rayberan cehdêko veng o. Birêz Ocalan bi cigêrayîşanê xo yê aşitî serra 93 ra nata bitecrube û samîmî yo. Ma yanî sazîyê sîyasîyî yê sey HDP, HDK, KCD û DBP eşkenê awankerdişê aşitî de ca bigîrê. Rayberîya awankerdoxe ya aşitî yewna çîya. Na yewe ra bê Ocalanî nêbeno, nuqte.”