Hemserekê Pêroyî yê HDP’yî yo verên Selahattîn Demîrtaş bi rayîrê SEGBÎS’î  tewrê  roniştişê dewaya xo ya Kampusê Zîndanê Sîncanî bi.

Pawitişê Demîrtaşî ra tayî cayî wina yê:

"2010-2011’ de xeylî endamê partîya ma bi hemparîya AKP-Cematî ameyî tepiştene. Bi sebebo ke ma wayîr înan vejîyayî, hetê heman dozgeranê cematî ra ma sey‘ endamê rêxistina terorî‘ ameyî sucdarkerdene û 9 serrî ra dima na rey ez yena muhakemekerdene.

Kam Vera Aşitî Nêrehat o?

Ocalanî dir qet pêvînayîşî nêameyene viraştene. Ma zî Newroz de û her firsend de bale antene naye ser. Kam vera naye nêrehet bi? dozgero ke fezleke keno hadre kam o? endamê cematî yo. bi nameyê kamî tê gêrayenê? Belka o zî nêzano kamî rê xizmet keno. La ê ke talîmatê kam ke nameyê Ocalanî bîgo fekê xo tepişnê, kuçeyan de bikişê, parlamenteran rê fezleke hadre bikerê, eke rojnamegera/o linc bikerê, bêkar biverdê danê  êyê ke vernîya pêvînayîşanê Ocalanî gênê ê yê. Qey? Çunke Oslo û demê Îmralîyî yo ke dima ra ame desptêkerdene  kontrolê înan de nêbi. No dem hetê şarê Kurdî û Tirkîya ê ke paştî dayêne yewbînan ra ameyêne domnayene. Yew dozger qey vera naye nêrehet o? qey nêwazeno aşitî bêro welatê ci?  

Dewlete PKK û Ocalanî Dir Pêvînayîşî Viraştî

Gama ke mi vatêne ma çirey îşkenceyo ke şima Rayberê yew şarî rê kenê qebûl nêkene û vera naye ma do meyanan de bi,  7 mengî Ocalanî ra xebere nameyene girewtene. Verê naye yew serre û nêm timtûm Ocalanî dir pêvînayîşî ameyêne viraştene. Pêvînayîşê Oslo.  O dewr de ma mîyanê pêvînayîşan de nêbî la ma teber ra teqîp kerdenê. Mabênê dewletê û PKK de Îmrali  û Oslo de bi berpirsîyaranê dewlete û PKK’yî pêvînayîşî ameyî viraştene.

Ocalanî Semedê Aşitîye Game Girdî Eştî û Karêko Birûmet Kerdo

Ewro bi sebebo ke mi vato,‘Birêz Ocalan, Rayberê Şarê Kurdî‘ şima mi sûcdar kenê. Memûranê na dewlete bi destûrê Wezîrîya Zerîyî mi mi berdêne Îmrali.Tewr tay ma 30 rey şîyê Qendîl berpisîyaranê  tewr girdan ê PKK’yî dir pêvînayîşî viraştî. Heme zî bi destûr û paştdayîşê hukmatî ameyî organîzekerdene. Kam ke semedê biranyîşê gonî, hewnakerdişê nê adirî çilkêka awe bikirişo birûmet o. Bi sebebo ke Ocalanî semedê aşitîye game girdî eştî  karêko birûmet kerdo. Ez umîd kena ke firsend beno û o hîna zaf zî keno.

Mazlûm Dogan Sembolê Xoverdayîşî yo

Vanê mi teror wasifnayo. Mazlûm Dogan vera faşîzmê 12’ê Êlule Zîndanê Amedî de  bedenê xo  tafîna  û sey xeylî xoverdayoxanê Zîndanê Amedî yê bînan bîyo sembol. Eke ez herinda şima de bîyêne, dozgerêko biwîjdan û biehleq biyêne  dozgêro ke no tehqîqat akerdo mi derheqê ey de tehqîqatêk akerdene.

Nameyê Naye Faşîzm o

No fezleke de çîyê kê mi kerdî ra zafêr çîyê ke mi nêkerdî rîyê nînan ra ez yena sucdarkerdene. Ziwanê sîyasîyî de naye ra vanê faşîzîm.''