Demîrtaşî seba “dersdayîşî”veng da ke her kes şoro serê sindoqe

Hemsereko verên o rehîn ê HDP’yî Selahattîn Demîrtaşî, vat, raya weçînayoxanê HDP’yî stratejîk a û dewamê ci de vat, “Seba ke merdim derse bido nînan zî ganî şoro serê sindoqe”.

Demîrtaşî rojnameyê Yenî Yaşamî rê derheqê weçînayîşî de peyamî dayî û weçînayoxanê HDP’yî ra waşt her kes vera faşîszmî şoro serê sindoqe.

Demîrtaşî derheqê îdîayanê hemkarîya CHP û ÎYÎ Partîye de vat, “Ne tifaqa ma û ne zî hemkarîya ma CHP û ÎYÎ Partîye reyde esta. Labelê seba ke ma şima bişawê çopdane Rojakewtene de rixmê CHP û ÎYÎ Partîye ma paştdayîşî danê endamanê înan û ma do serdestî bihejnê. Ê yê ke HDP’yî ehmeq vînenê, ê do îradeyî 31'ê Adare de sindoqe de bivînê.” Demîrtaşî  vendgayîş kerd û vat, eke piçîkê xatirê ci esto, o rîca keno ke şar şoro serê sindoqe û raya xo ya ke yena manaya “Faşîzmî rê ney” bido.

Demîrtaşî vat, “Netîceyê weçînayîşî beno ke seba xurtbîyayîşê demokrasî û haştîye bibo firsend. Seba naye zî raya şima zaf hêca ya. Qet boykotkerdişê weçînayîşî nêfikirîyê. Ma şarê xo ra, cayê ke ma namzedî nêvetê, ma nêwazenê bi heskerdiş yan zî zerrî û can ra raya xo bidê CHP û ÎYÎ Partîye. No rastikên zî nîyo. Labelê rey-rey rayêk zaf peyaman zî dano. Raya şima “bi hêzêkê zaf peyaman”, rayayêka stratejîk a.”

Dermîrtaşî wina dewam kerd, “Tîya ra na mana nêvejîyo; ‘gelo çîyî estê ke ma pê nêzanê, çira hende naye de israr kenê?’ Ney. Çîyêko nimite çin o. Faşîzmo eşkera esto û vera ci xoverdayîşo zelal esto.” Her îmkano ke vernîya faşîzmî do bigêro, sînordar bikero, zehîf bikero hêz bido ma. Hewcadarîye bi analîzanê xorînan çin a: şorê serê sindoqe û dersêk bidê nê polîtîkayanê bêheysîyetan. Seba ke merdim dersêk bido nînan zî, ganî şoro serê sindoqe.”