Denîz Firate ( Methîye Yildiztane) ya ke hêrişê DAÎŞ’î yê 8ê tebax a 2014î yê Kampa Mexmûrî de cuya xo vînî kerde, qezaya Ebaxe ya Wanî de gorê xo ser ameye vîrardene. Mexmûr de zî  semedê Frate aktîvîteya vîrardişî ameye kerdene.

Rojnamegerê Platformê Rojnamegeran ê Cinîyan ê Mezopotamya (MKGP) û Komeleya Rojnamgeran ê Dîcle Firatî (DFG) û merdimê Denîze Firat tewrê vîrardişî bîyî.

Rojnamegeranê MKGPî ra Safîye Alagaşa ke tîya qisey kerd vat: ''Denîze hetê hêzanê tarîyan ra ameye qetilkerdene la semedê Çapemenîya  Azade û cinîyanm kurdan rayîro roşn akerd.  Ma serê gorê aye de reyna soz danê ke ma têkoşînê aye biresnê serkewtişî.''

Hemserekê DFGyî Serdar Altanî zî vat: ''Denîze Firat gama ke çeteyanê DAÎŞî hêrişê Kampa Mexmûrî kerd pa kamareya xo vernîya têkoşînî de bî û qet gamêke peyser nêeşte. Gama ke şer bi xorî înanê ke tira vatêne peyser biance aye pê vatişê ‚ ez zî pê kamaraya xo şer kena cewab da û dima ra tewrê kerwanê şehîdan bîye. Ma do xoverdayîşa Denîzan xo vîra nêkerê.''

Birayê Denîze Firat Seyat Yildiztanî zî ard ziwan ke ke embazanê Denîze qelema aye erdî nêverda û do nêverdî û vat ê zî sey keyeyê ci têkoşînê ci do bidê domnayene.

Dima ra vilikî serê gorê Denîze de ameyî ronayene û dûayî ameyî wendene.

Mexmûr de zî semedê vîrardişê Denîze Firat aktîvîteya vîrardişî ameye kerdene. Aktîvîte de embazanê Firate sozê pîlkerdişê têkoşînî daye û vat hemrayê Denîze do waştişanê aye bîyarê ca.

Dayîka Denîze Firat Sultan Yildiztanî zî vat eynî roje kênaya ci Denîz Sarya zî şehîde bîye û  vat dejê înan zaf pîl o la ê pê şehîdanê xo sereberz ê.