Kerdişê ke bajarê Efrînî yê Rojawanê Kurdistanî de qewimîyenê hendî medyaya Almanan de zî ca gênê. Kovaranê serekeyan ê Almanya ra Der Spiegelî keyepelê xo yê înternetî de xebere-analîzêk derheqê qewimîyayîşanê Efrînî de weşanaye.

Xeberdaranê kovare ra Christoph Sydowî xebere amade kerde û vist vîrî ke dimayê îşxalkerdişê dewleta Tirkî zafaneyê nufûsa Kurdan a Efrînî koç kerdo. Sydowî ca da tayê tespîtanê wezîfedarê taybetî yê verî yê DYA yê Koalîsyonê Mîyanneteweyîyî yê hemverê DAÎŞ’î Brett McGurkî yê ke kovara “Foreign Affairs” de ca girewtê.

McGurk nûşteyê xo de ya ke sernameyê ci “Rastîyê bidejî yê Sûrîye” dano zanayene ke hêrişê serê Efrînî yê dewleta Tirkî rîyê fikaranê ci yê asayîşî ra nêbi, hêriş seba waştişê Erdoganî yê hîrakerdişê sînorê welatê ci ame kerdene.

‘Gorê Elewî û Êzîdîyan Ameyî Rijnayene’

Xebere-analîz de ame bi vîrardene ke dewleta Tirkî nêverdana çimdarê xoserbîyayeyî şirê Efrîn û derheqê qirkerdişê etnîkî û kulturkî de hayîdarîyan arê bidê. Xebere de ame vatene goreyê fotografanê ke bi satalîte ameyê antene gorê Elewî û Êzîdîyan ê ke verê cû herême de bîyî, ameyê rijnayene. Kovare bale ante ke qirkerdişo etnîkî û kulturkî bîyo perçeyêkê cuya rojaneye.

Xebere-analîz de ame vatene nameyê mehleyanê Efrînî bi Tirkî ameyê vurnayene, ziwanê Kurdkî mekteban ra ameyo wedartene, bi giranî bi Tirkî dersî yenê dayene. Kovare de ca dîya vatişanê hemsereka PYD’yî Eyşe Hiso yê derheqê azadîya Efrînî.

Xebere de ame vatene ke Hiso ê kesan ra yew a ke Adara 2018’î de neçar menda Efrînî ra vejîyo û nika kena ke dûrî ra wezîfeyê xo yê kampanê multecîyan rayra bero. Kovara Der Spiegelî derheqê hêrişanê peyênan ê serê Efrînî yê hemverê leşkeranê Tirkî û çeteyanê ci de zî hayîdarîyî dayî û nê vatişê Hiso pare kerd: “Hêrişê ma perçeyêkê xoverdayîşê ma yê. Ma do Efrînî yewîyanê Tirkan rê bikerê sey sîlike.”