9 kesê ke mîyanê Komîsyonê Teqîbê Apeyantişî yê 'Prosesê Çareserîye' de ca girewtêne, menga vîyarte de Wan de ameybî tepiştene. Derheqê înan de îdîaname ame amadekerdene. Îdîaname de eşkerayîye û çalakîyê demokratîkî yê 9 kesan sey sûcî hesibîyayê.

Îdîaname de Atîlla Kumlî seba ke îdarekarê Komeleya Paştdayîşê bi Keyeyanê Rojawanijan bi, Behîce Abî seba ke îdarekara WAN GOÇ DERî bîye, Omer Işik seba ke îdarekara Komeleya Qedînayîş û Têkoşînê vera Xizanîye ya Wanî bi, Salîp Îpek seba ke endamê WAN-DERî bi, Yakup Aslan seba ke endamê WAN-DER û Komeleya Hetkarîya Keyeyanê Tepişteyan û Hukmwerdeyan bi sey sûcdarî yenê dîyene.

Îdîaname de ame îdîakerdene ke tepişteyan ra Harun Okay pê muzîkanê xo wesfê rêxistine dayêne û keyeyê ey de dîmen û şîîrê ke wesfê rêxistine dayêne, ameyê tesbîtkerdene.

Dozgerîye beşê netîce yê îdîanameyî de îdîa kerd ke fotografê ke o çax gerîlayan reyde ameyê girewtene, seba delîlê sûcdarîye qîm kenê.