13ê sibate de Madenê Zerdî yê Çoplerî de, qezaya Licikî ya Erzînganî de hezaz qewimîyabi û hezazî reyde sîyanurê madenî derûdorî ra vila bibi. Derheqê serebûtî de tehqîqat dîyabi destpêkerdene û 8 kesî ameybî destbendkerdene. 8 kesî îfadeyan ra dima sewqê edlîye bîyî.

 Kesê bi nameyanê J.R.G, A.C, H.U, M.B, Ş.D, S.D, M.T û A.R.K. dima vejîyayî verê Mehkemeya Cezaya Sulhe.

Walîtîya Erzînganî derheqê babete de eşkerayîye daye û vat ke îdarekaranê şîrketa madenî ya Anagoldî ra JRGyo ke maden de xebitîyayêne zî tede 6 kesî tepişîyayê û 2 kesî zî bi şertê kontrolê edlîyî vera dîyayê.

Hetê bînî ra warê madenî de hema zî karkerî Şaban Yilmaz, Abdurrahman Şahîn, Huseyîn Kara, Mehmet Kazar, Fahrettîn Keklîk, Adnan Keklîk, Ugur Yildiz, Kenan Oz û Ramazan Çîmen binê herre de yê. 5 rojan ra nata karkeran ra rêçêk zî nêame dîyene.