Garîbe Gezer Zîndanê Kandira de 9ê kanûna 2021î de bi hawayêkê şikdarî hucreyê yewkesî de dinyaya xo bedilnabî. Seba ke dosya ser o bira nimite est a, avûkatî nêeşkenê xo biresnê dosya. Labelê zîndanî ra agahîyêka newîye ameye. Tepişteya sîyasîye Yildize Keskîna ke beşê hucreyê Garîbe de mendêne serebûtî ra dima babîyê xo Fahrettîn Keskînî rê vat ke Garîbe Gezer beno ke ameya kiştene.

Keskîno ke heman wextî de Endamê Komeleya Paştdayîşê bi Keyeyanê Tepişteyan û Hukmwerdeyan (TAYAD) o, ANFyî rê qisey kerd.

Keskînî dîyar kerd ke mergê Garîbe Gezer ra dim rojan dima ey kênaya xo zîyaret kerde û vat: ''Wexto ke mi kênaya xo dîye, vateyê ci yo verêne bi 'Babo beno ke Garîbe ameya kiştene.' Garîbe kênaya mi rê vato gardîyanan zaf reyî a tacîz kerda û îşkence kerdo,  a eşta odaya sungerîne û tim vatêne 'Rewşêka xirabe de ya, ê tim xîret kenê ke mi tacîz bikerê, mi bikişê.' Coka tepişteya sîyasî Nurgule Acar waştişnameyêk da îdareyê zîndanî ke wa Garîbe bêra ardene bi hucreyê înan. La waştişname nêame qebulkerdene.''

Yildize Keskîn babîyê xo rê vato ke a beşê hucreyê Garîbe de mendêne coka qîrayîşê Garîbe eşnawitêne. Babî Keskînî vat: ''Kênaya mi vat ke 'Teda û îşkenceyî ra psîkolojîya aye xeripîyabî. Têna îşkenceyo psîkolojîk nê ci rê îşkenceyo fîzîkî zî ameyêne kerdene coka rewşa ci giran bîye.''

Avûkata Garîbe Gezer Jîyane Tosun zî vist vîrî ke mergê Garîbe ra çend mengî derbaz bîyî la hema zî tehqîqat aver nêşîyo. Tosune îfade kerd ke bira nimite ra ê nêeşkenê xo biresnê dosya û vat: ''Ma bira nimite rê îtîraz kerd labelê o zî ame redkerdene. Ma di mengî verî pers kerd la rapor hema zî nêameyo. Tehqîqatê Serdozgerîya Komare ya Kandira giran şino. Seba ke no merg zaf bi rojdem nêwazenê cade tehqîqatî biqedînê.''