Komîteya Wezîran a Konseya Ewropa (KE), Mehkemeya Heqanê Merdiman a Ewropa (MHME) û Komîteya Vergirewtişê Îşkenceyî (CPT) cewabê mektubanê serê tecrîdkerdişê Rayberê Şarê Kurdî da.

MHME cewab da mektuba ke nameyê 69 wayîranê Nobele ser o Profesore Kariane Westrheim nuştbî. Mektuba bi tarîxê 29ê tebaxe de selahîyetdara MHME Marialena Tsirli teyna vat ke şertê tecrîdê Îmraliyî bala înan zî ancena û sipas kerd.

Naye ser o mektubêko bîn nuşt, venga MHME da ke seba ke heyetêk şoro Îmraliyî wa erkê xo bîyara ca û vist vîrî CPT û KE reyde MHME zî pawitişê heqanê merdiman ra mesuldar a.

Kariane Westrheim mektube de vat: ''Birêz Ocalanî 42 mengan ra nata teberê zîndanî de têkilîyêke nêviraşte ke no sebebê qesawetan o. Seba ke Tirkîya endama nînan a CPT û KE seba pêvînayîşanê Îmraliyî eşkenê teda bikerê.''

Kariane Westrheim nameyê 69 wayîranê Nobele ser o Komîteya Wezîran rê zî mektubêke şawitbi. Cewabê na mektube zî Wezîrê Karanê Teberî yê Lîtvanya û Serekê Komîteya Wezîran Gabriellius Landsbergisî da.

Landsbergisî pare kerd ke şertê tepişîyayîşî Ocalanî kombîyayîşê înan  de do bêrê ercnayene.

Kariane Westrheim wina cewab da na mektube zî: ''Ma pê kêfweş bîyê ke şima do babete teqîb bikerê. La ma verê cû zî dî ke Tirkîya cewab nêdana vengdayîşanê Komîteya Weîran. Ganî Komîteya Wezîran tedaya Tirkîya bikerê ke Ocalan bieşko keye û avûkatanê xo bivîno.''

Serekê CPTyî Alan Mitchellî cewab da mektuba Wekîlê Parlamentoyê Îspanya Pueyo Sanzî û îfade kerd ke ê rewşa Îmraliyî nêzdî ra teqîb kenê û do bikerê.