Rêxistinanê HDP û DBPyî yê Dêrsimî semedê şermezarkerdişê tepiştişê Hemserekê Pêroyî yê DBPyî Keskîn Bayindir û Hemsereke Partîye yê Amedî Hayrettîn Altunî Kuçeyê Hunerî de eşkerayîya çapemenîye kerde. Temsîlkaranê partîyanê sîyasîyan ê bînan zî paştî daye çalakîye.

Çalakîye de pankartê ''Şima eşkenê rehîn bîgêrê la nêeşkenê teslîm bîgêrê'' ame akerdene. Hemserekê DBPyî yê Bajarî Murat Polatî ard ziwan ke ê tim vera operasyonanê qirkerdişê sîyasîyî têkoşîn kenê û vat: ''Înan vat qey pê rehîngirewtişî ma rê peyser game bidê eştene la bi serran o pê nê hêrişan çîyêk dest nêfînayo. Ma do hêzê xo wextê vîjnayîşî de ramojnê. Ters-xof feyde nêkeno. Têkoşînê kurdan û hetanê demokratîkan do dewam bikero.''

Polatî êyê ke Qirkerdişê Roboskî de ameyî qetilkerdene,  yad kerdî û vat: ''Kiştoxanê Roboskî hema zî hesab nêdayo û yeno waştene ke serê qirkerdişî bêro girewtene. Ma do semedê cezakerdişê kiştoxan têkoşînê xo bidomnê.''