Meclîsê Ciwanan ê Partîya Çep a Keske Meydanê Seyîd Rizayî de bi şîarê “Ciwanî semedê bedilnayîşî yenê têhet” şayayîye kerde. Warê şayîye de pankarta “Têkoşînê ciwanan serkewtişo qetî yê komelî yo” ameye daliqnayene. Paramenterê HDPyî yê Dêrsimî Alîcan Onlu û ciwanî tewrê şayîye bîyî.

Meclîsê Wendekaranê Demokratîkan ra Enes Ozturkî ke verê şayîye qisey kerd, bi wesîleya serrgêra Terteleyê Dêrsimî kesê ameyî qetilkerdene yad kerdî û vat: “Ma xîlê û kayanê şima rê milê xo çewt nêkerd, ma do milê xo çewt nêkerê zî. No zî şima rê wa bibo derd. Ma rojê  xo yê tîjinî yê rindî dîyî. Şima hinda nêeşkenê ma vindarnê. Ma pê gamanê pêtan avêr şinê, peyseragêrayîş çîn o.” 

Alîcan Onluyî zî vat: “Hesabê ma û vînîkerdişê ma yê seserre est o. Na seserre de ma do vînîkerdişanê xo peyeser bifînê dest. Semedê azadkedişê  heme şaran, bawerîyan nasnameyan, cinîyan, ciwanan û xoza, yanî semedê azadkerdişê kurdan û demokratîkbîyayîşê Tirkîya ma raya xo bidê Partîya Çep a Keske. Wazenê Dêrsimî bikerê Tuncel. La do çirey destûrê nê mero dayene. Şar haştîye wazeno û aktorê na haştîye Birêz Ocalan o. Gerek no tecrîd bêro wedaritene ke vera şaran, xoza, kultur û bawerîyanê ma yo.”

Badê qiseykerdişan şayîye bi vatişê deyîran,  wendişê şîaran û govende qedîyaye.