Endamê Komîteya Zîndanan a PKKyî Pîro Dêrsimî cewab da persanê ANFyî. Qiseykerdişê Dêrsimî ra beşêk wina yo:

''Planê Çinkerdişî yo ke 2014 de hetê AKP-MHP Ergenekonî ra amebi amadekerdene nê 6 serran de ame çinkerdene. Nika nê hemkarî kewtî pê. Eke ewro yewo sey Sedat Pekerî îtîrafan keno no netîceya çinbîyayîşî de bîyo. Na netîce pê bedelanê giranan ê têkoşînê ma de ameye afernayene. Serkewtişo ke gerîlayan Heftanîn, Garê, Metîna, Zap û Avaşîn de vist destî dewleta faşîste çin kerde.

Dewleta tirke verê gerîlayan de teng bîya coka PDKyî erşawena vernî ke aye binkewtişî ra bixelisna. La PDK do nêeşko dewlete bixelisno. Nê îtîfaqê faşîstî reyde Kurdîstan de xeta îxanetî zî do bin bikewa.

Zîndanan tim têkoşînê ma de rayberîye kerde. Dişmen ney hol zaneno coka tim tedaya zîndanan keno. Zîndanan de huqûq nêno caardene. Bi hezaran tepişteyê nêweşî nênê tedawîkerdene û şehîd benê. Tepişteyî vera nê çîyan xora grevde yê.

Rayber Apoyî grevê vêşanîye sey xoverdayîşê rûmetênî pênase kerdbi. Polîtîkayê dişmenî vera nê xoverdayîşî  bin kewenê. Tewr zêdêr zîndanan cewab da Hemleya Wextê Azadîye. Tepişteyî 200 rojî yo bi qerardarî têkoşînê xo dewam kenê. Heta ke tecrîd nêqedo tepişteyî do grevê vêşanîye rê dewam bikerê. Ganî ma wayîrê nê xoverdayîşî vejîyê. No wezîfeyo bingeyî û wijdanî yo. Ez venga keyeyan, rêxistinanê komelê sivîlî, dezgehanê welatperweran, cinî û ciwananê kurdan dana ke rayberîya nê prosesî bikerê.

Ganî dezgehê huqûqî zî na babete ser o têbigêrê. Wa her kes bizano ma her wextî ra zêdêr nêzdîyê serkewtişî yê. Eke nê bingeyê wayîrvejîyayîşê zîndanan û xoverdayîşê gerîlayan de têkoşînê vera faşîzmî bêro pîlkerdene serkewtiş do ê ma bo.''