Dêrsim: Qedexeyê keyfî yê çalakîyan wa bêro wedaritene

Walîtîya Dêrsimî bi bahaneyê janê Korona her menge de çalakî  û aktîvîteyan qedexe kena. Temsîlkranê dezgehanê Dêrsimî vera nê qedexeyan hersê xo ard ziwan û waşt ke qedexe wa peyser bêro antene.

Walîtîya Dêrsimî bi bahaneyê janê Korona her menge de çalakî  û aktîvîteyan qedexe kena. Vera nê qedexeyan nêrazîbîyayîşî zêdîyenê. Temsîlkranê dezgehanê Dêrsimî ke Ajansê Pîrha rê qisey kerd waşt wa qedexe bêro wedaritene.

Hemserekê HDPyî yê Dêrsimî Îbarahîm Kasunî vist vîrî ke nêzdê yew serre yo ke Dêrsim de aktîvîte û çalakîyî qedexe yê vat: ''No qerarê qedexeyî ke Walîtîya Dêrsimî girewto îqtîdarê faşîstî yê AKP-MHPyî ra xoser nêyo. Wazenê tîya vengê muxalefetê demokratîkî bibirnê û polîtîkayanê xo bîyarê ca. Seba ke vera nayî nêro vejîyayeye çalakîyan û aktîvîteyan qedexe kenê. Ma sey partîyanê sîyasîyan û dezgehanê komelê sîvîlî nê qedexeyan qebul nêkenê.''

Hemserekê DADî Musa Kuluyî zî vat: ''Îqtîdarî welato açarnayo hepisxane. Heme dîn û kulturê ê bînan qedexe û înkar kerdî.  Dêrsim pê bawerî, ziwan û kulturê xo cayêko xoser o. Coka her îdarekaro ke yeno tîya taybet o. Seba ke vengo muxalîfo ke tîya ra vejîyeno Tirkîya û dinya meeşnawê qedexeyan anê. No têna qedexeyê walîtîye nêyo.  Heme walîyê ke nê bajar qedexeyan anê. Walî pê nê qerarî hetê huqûqî ra sûc keno.''

Hemserekê SESî yê Dêrsimî Kahraman Yurukî zî qerarê qedexeyî sey qerarêkê keyfî name kerde û vat: ''Bi bahaneyê janê Korona wazenê vengê muxaleftî bibirnê. Jan têna çalakîyan de vila nêbeno, no qerar raşt nêyo. Walîtîya Dêrsimî ganî cade na xeletî ra agêro.''

Hemserekê EMEPî yê Dêrsimî Ergîn Tekîn zî vat: ''Hetêkî ra çalakî û aktîvîteyî yenê qedexekerdene hetê bînî ra îqtîdar kongre û mîtîngan keno. Eslê xo de pê nê qedexeyan wazenê vengê hetê muxalîfî bibernê.''