Rêxistina HDPyî ya Çewlîgî semedê astengkerdişê polîsan ra bînaya xo de eşkerayîyêka çapemenîye daye û vera Dewaya Kobanê nêrazîbîyayîşê xo mojna. Eşkerayîye de pankarta bi nuşteyê 'HDP şar o, şar nêno muhakemekerdene' ameye akerdene.

Hemsereka HDPyî ya Çewlîgî Arzu Firat eşkerayîye wende û pare kerd ke îdîanameyê vera Kobanê pê zûran û îftîrayan pirr o û pê fermanê qesre ame amadekerdene. Arzu Firat vat: ''Na dewa mojnena ke hîşmendîya DAÎŞî dewam kena. Yeno waştene ke HDP bêro tasfîyekerdene. Oyo ke do Dewaya Kobanê de bêro muhakemekerdene îqtîdarê AKP-MHPyî yo. AKP hetêkî ra pê rayîrê Dewaya Kobanê keno ke sîyasetê demokratîkî bixeniqno hetêkî ra teberê sînoranê xo de operasyonan keno. Ma nê hêrişanê vera destkewteyanê kurdan şermezar kenê. ''