HDPyî xeylêk bajaranê Kurdîstanî û Tirkîya de Dewaya Kobanê ya ke 28ê ci tepişteyî 108 sîyasetmedarî yenê muhakemekerdene şermezar kerde.

Rêxistina HDPyî ya Amedî verê banê Yenîşehîrî de eşkerayîye daye. Îdarekarê HDPyî yê merkez û qeza û xeyêk temsîlkarê rêxitidananê komelê sîvîlî tewrê çalakîye bîyî. Hemserekê HDPyî yê Amedî Zeyyat Celanî bale ante serê ke Dewaya Kobanê sey dewaya sîyasîye hetê îqtîdarî ra yena reyraberdene û vat: ''Dewa bi kayanê leyminan, zuran ameye amadekerdene. Na dewaya ke pê ci yeno waşten ke komel rehîn bêro girewtene û demokrasî bêro fatisnayene, mojnena ke zîhnîyetê DAÎŞî yeno domanyene. Ganî sere de rayrapêroyîya demokratîke heme sazgeh û dezgehê komelê sîvîlî vera na neheqîye vejîyê. Peynî ra tewr peynî îqtîdarê AKP-MHPyî do bêro muhakemekerdene.''

Dêrsim de zî bi eynî waştişî hetê HDPyî ra Kuçeyê Sanatî de eşkerayîye ameye dayene. Hemsereke Nuşate Yeşîl ard ziwan ke îqtîdarê AKP-MHPyî pê Dewaya Kobanê cehd keno ke  sîyasetê demokratîkî bifatisno. Yeşîle vat hetê bînî ra zî pê operasyonanê teberê sînorî polîtîkaya xo ya vera kurdan dano domnayene û sîyasetêkê vilabîyayîşî hedef keno. Yeşîle heme hêrişê vera destkewteyanê kurdan şermezar kerdî û semedê pîlkerdişê paştdayîşî veng da.

Reyna Mêrdîn, Şirnex, Riha, Wan, Mûş, Colemêrg, Sêrt,Dîlok û Îzmîr de bi eşkerayîyan hêrişê îqtîdarî yê vera HDPyî û kurdan ameyî şermezarkerdene û semedê paştdayîşê HDPyî ame vengdayene.