Endamê Komîteya Zîndanan a PKKyî Pîro Dêrsimî derheqê polîtîkaya dewleta tirke ya vera tepişteyanê sîyasîyan, xoverdayîşê zîndanan û wayîrvejîyayîşê tepişteyan de ANFyî rê qisey kerd.

Qiseykerdişê Pîro Dêrsimî ra beşêk wina yo:

''Dewleta tirke 2015 ra nata vera kurdan konseptê hêrişan ana ca. Coka verî Rayber Apo û xoverdayîşê Îmraliyî kerd hedef. Xoverdayîşê Rayber Apoyî yê vera sîstemê Îmraliyî girîng û manadar o. Dewleta tirke vera zîndanan şîarê 'yan teslîmîyet yan zî çinkerdişî' esas kena. Rayber Apoyî Îmrali kerdo warê xoverdayîş û têkoşînê vera faşîzmî.

Nika gerîlayê azadîye Herêmanê Pawitişî yê Medya de xoverdayîşê pîlî kenê. Gerîlayî bi perwerîya Rayber Apoyî plananê kolonyalan û îxanetî şiknenê û benê sebebê rijîyayîşê îqtîdarî, moralê şarî. Xoverdayîşê gerîlayan nêverda ke dişmen ser bikewo. Xoverdayîşê zîndanan zî sey xoverdayîşê gerîlayan girîng o û rolê ci yo pîl est o. Zîndanan û koyan de xoverdayîşo ke layîqê xoverdayîşê Rayber Apoyî yo, yeno kerdene. Xoverdayîşo komelkî zî serê esasê Şerê Şarî yê Şorişgêrî de serkêşîya cinî û ciwanan de yeno kerdene. Nê xoverdayîşê pîlî do peynîya dewleta tirke ya faşîste bîyarê.

Zîndanî stunanê tewr girîngan ê konseptê qirkerdişî ra yew o. Dewleta faşîste seba ke îradeyê komelî bişikna vera bi des hezaran tepişteyan polîtîkayanê taybetan ana ca. Armancê şerê taybetî yê vera zîndanan no yo ke xoverdayîşê teberî apey bero, komelî bêserkêşan war verdê, pê girankerdişê şertanê zîndanan çimanê şarî bitersnê, îradeyê şarî bişiknê, têkoşînî biqedînê, qesas bigêrê û tepişteyanê şorişgêran têkoşînî ra dûrî bivisnê.

Goreyê eşkerayîyanê ÎHDyî serra peyêne de qasê 50 tepişteyanê şorişgêr û welatperweran zîndan de dinyaya xo bedilnaye. Tesadûf nîyo ke embazê ke 30 serrî yê zîndan de yê şehîd benê. Dermannêkerdişê tepişteyan, hucreyê yewkesî de verdayîş, mîyanê şertanê xiraban de tepiştiş yeno manaya kiştişî. Dewleta tirke seba ke tepişteyê nêweşî bimirê destê ci ra çi yeno kena. Dezgehê Tipê Edlîyî (ATK) yê dewlete raporê 'eşkeno/a zîndan de bimano/a' dano tepişteyanê nêweşan. Tedawîya tepişteyan yena astengkerdene. Polîtîkaya kiştişî bi nê hawayî qestî ra yena caardene.

Zîndanî tim pê polîtîkayanê teda û îşkenceyî yenê rojdem. La oyo girîng xoverdayîşê tepişteyan o. Zîndanî warê xoverdayîşî yê tewr bingeyî yê têkoşînê ma yê. Coka tewiro xoverdayox ê embazanê tepişteyan ma rê dîyarker o. Xoverdayîşo ke serranê 80an de Zîndanê Amedî de dest pêkerd bi Xoverdayîşê 14ê Temmuze dewam kerd. Tradîsyonê ma yê xoverdayîşê zîndanan 40 serre ra zêdeyêr o. Reyna serkêşîya Rayber Apoyî de xoverdayîşê Îmraliyî serra 24. de bêmabên dewam keno. Çend tengîye est ba zî serê esasê şîarê 'Xoverdayîş ciwîyayîş' de zîndanan de xoverdayîşêko cidî est o û no moral dano ma.

Vera îşkence û zulmê zîndanan wayîrvejîyayîşê tepişteyan kêm maneno. Nê warî de qelsî û kêmasîyê cidîyî est ê. Nobetê Edaletî bi qerardarî dewam kenê. Ez nê keyeyan selam kena. Ê serkêşîya xoverdayîşêkê girîngî kenê. La xoverdayîşê keyeyan hema zî hende pîl nêbi. Wayîrvejîyayîşê tepişteyan têna erk û mesuldarîya keyeyanê înan nîyo. Erk û mesuldarî ê pêro şarê ma, dezgeh û rêxistinanê ma yê. Embazê ma yê tepişteyî raştê faşîzmê pîlî yenê. Coka ganî pêro dormeyê demokratîk, şorişgêr û rêxistinkerdeyî vera faşîzmî erk û mesuldarîya pawitişê tepişteyan bîyarê ca. Ganî pêro şarê ma, dezgeh û sazgehê Kurdîstanî, roşnvîr û hunermendî vera faşîzmî têkoşîn bikerê û têbigêrê.''