Hemserekê Pêroyî yê HDPyî Mîthat Sancarî mîtîngê Amedî ra dima ewro partîyê kurdan Partîya Herêmanê Demokratîkan (DBP), Partîya Demokrate ya Kurdîstanî ya Tirkîya (PDK-T), Partîya Azadîye û Merdiman (PÎA), Partîya Komunîste ya Kurdîstanî (KKP), Partîya Azadîye û Komeleya Kurdan a Demokratîk-Şorişgêre (DDKD) zîyaret kerdî.

Sancarî PDK-Tyî ra dima PÎA zîyaret kerde. Serekê PÎA Mehmet Kamaç û heyetê ci Sancar pêşwazî kerd. Kamaçî îfade kerd ke bi rayîrê hîrêyîne Tirkîya eşkena meseleyanê xo çare bikera û vat: ''Rayîro hîrêyîn rayîrê wayûbiratî û haştîye yo.''

Sancarî zî qala xebatanê îtîfaqê bi partîyanê kurdan de kerde û vat: ''Verê ma de prosesêko krîtîk est o. Vera polîtîkayanê serê Başûr û Rojawanê Kurdîstanî şar hêrsbîyaye yo. Mesuldarîya ma ya ke vera ney ma îtîfaqê xo pîlêr bikerê. Ganî kurdî meseleyanê xo pê dîyalogan çareser bikerê. Nêbo kurdî do bin bikewê. Coka xebatê Îtîfaqê Kurdî girîng ê û ganî hîra bibê. Ma do êlule de Îtîfaqê Kurdî rayaumûmîye rê îlan bikerê.''

Sancarî dima KKP zîyaret kerd. Serekê KKPyî Sînan Çîftyurekî û heyetê ci heyetê HDPyî pêşwazî kerd. Sancarî dima Partîya Azadîye zîyaret kerd.

Zîyaretê Partîya Azadîye de zî Sancarî da zanayene ke ê do pêro beşanê komelî reyde îtîfaqê demokrasî awan bikerê, fikrê her kesî bigêrê û cîyayîyan wedarnê.''

Zîyaret de Serekê Partîya Azadîye Ayetullah Aşitîyî vat: ''Girîng o ke pêro reng û vengî bêrê têhet û qisey bikerê.''

Sancarî zîyaretê DDKDyî de zî qala bernameyê Îtîfaqê Demokrasî yê HDPyî kerde.