Hemserekê Pêroyî yê HDPyî Mîthat Sancarî mîtîngê Amedî ra dima ewro partîyê kurdan Partîya Herêmanê Demokratîkan (DBP), Partîya Demokrate ya Kurdîstanî ya Tirkîya (PDK-T), Partîya Azadîye û Merdiman (PÎA), Partîya Komunîste ya Kurdîstanî (KKP), Partîya Azadîye û Komeleya Kurdan a Demokratîk-Şorişgêre (DDKD) zîyaret kerdî.

Sancar merkezê DBPyî de hetê Hemsereka Pêroyî ya DBPyî Salîha Aydenîz ra ame pêşwazîkerdene. Aydenîze bale ante ser ke mîtîngo vizêrîn ê HDPyî mojneno ke şar mîyanê pêro şert û mercan de zî hetê HDPyî de yo.

Dima Sancarî dest pê qiseykerdişî kerd û ard ziwan ke ê do pê Îtîfaqê Demokrasî xurtêr bibê. Sancarî vat: ''Çend situnê îtîfaqê ma est ê ke ma tira vanê Îtîfaqê Demokrasî.Ney ra yewin ma 6 partîyanê çepgîran de kerd, oyo bîn zî komanê bawerîyan de do bêro kerdene. Ma têgêrayîşanê cinîyan, têgêrayîşanê ekolojî de zî heman karî kenê. Ma do ver bi komara demokratîke îtîfaqê xo ronê.''

Sancarî dima PDK-T zîyaret kerd û hetê serekê partî Mehmet Emîn Kardaşî ra ame pêşwazîkerdene. Sancarî tîya de vat: ''Armancê hêrişan û tedayanê dewlete çinkerdişê îradeyê şarê kurdî û bêtesîrkerdiiê têkoşînê demokrasî yê Tirkîya yo. Vera ney ma xo rê 'Îtîfaqê Demokrasî' awan bikerê.

Ma partîyanê kurdan reyde 2018 ra nata karêko hempar kerdêne ke no kar weçînayîşanê 2019 de aver şi. Çarçewa Îtîfaqê Demokrasî ma seba yewîye kar bikerê. Ma do 25ê tebaxe de karanê xo yê hemparanê ke sey masaya 7 endaman pênase kenê, rayaumûmîye rê îlan bikerê. Ma komanê bawerîyan de bi taybetî komanê elewîyan de karan jenê. Seba têkoşînê hemparî yê îtîfaqê demokrasî kokê kurdkî yê nê îtîfaqî girîng ê. Ma rê zaf lazim o ke ma Kurdîstan de dormeyêkê hemparî de, dormeyê armancêkê hemparî de kom bibê.''

Sancar zîyaretanê xo rê dewam keno.