Roniştişê 2. yê Dewaya Kobanê ya ke  îdarekarê Partîya Demokratîke ya Şaran (HDP) zî tede 28ê ci tepişte 108 sîyasetmedarê yenê muhakemekerdene ewro ame kerdene.  

Dozgerî vat seba ke derheqê waştişê redkerdişê dadgerî de qerar nêameyo girewtene ganî pawitişî bêrê kerdene. Sîysetmadaranê ke qisey kerd reyna sebebê waştişê xo yê redkerdişê dadgerî ardî ziwan.

Hemserekê Pêroyî yê HDPyî yo verên Selahattîn Demîrtaşo ke bi sistemê SEGBİSî tewrê roniştişî bî vat: ''Na dewa sey kayî vera HDPyî ameye akerdene ke dewaya qesasê sîyasîyî ya. Rojêke do Dewaya Kobanê bêro akerdene û perpirsîyarê raştî, îdarekarê hukmatî yê ke kuçeyî provoke kerdî, walî, qeymeqam, murdirê asayîşî, berpirsîyarê raştî ke qirkerdişî dayî kerdene do vejîyê werte. Wa her kes pê bawer bo ke o wext do ma nêrê muhakemekerdene. Na dewa de dozger û dadger çîn ê hêrinda înan de  Erdogan, Bahçelî, Soylu û medyaya paştgêra înan ronişteyê. Ma îradeyê şarêkî pê nê muhakemekerdişan nêdê eciqnayene. Seba ke berpirsîyarî bêrê muhakemekerdene ma do têkoşînê xo rê dewam bikerê.''

Hemsereka Pêroyî ya HDPyî ya verêne Fîgene Yuksekdage zî vat: ''Îqtîdaro sîyasî wazeno ma ra qesas bigîro.  Îqtîdar pê qefilnayîşê HDPyî û sûcdarkerdişê ma wazeno ser bikewo.  Ma do semedê şar û heqê xo destûr medê qetilkerdişê heqîqetî. Ma qerardar ê ma do hesab bipersê. Hukm mezg, wîjdan û aqilê şarî yo. Şima ganî na dewa caverdî qeraro raşt şar dano.''

Hemsereka Pêroyî ya DBPyî ya verêne Sebahat Tucel zî vat: ''Derheqê ma de delîlêk çîn o. serekkomarî wezîfeyêko muhîm dayo şima. Tîya zaf polîsî estê. Rejîmanê faşîstan de polîs estê. Êyê ke xo tarîtîye ra weye kenê roşnî ra tersenê. Coka ma ra tersenê. Meselaya kurdî mehkeme de nê salonanê muzakerayan de yena çareserkerdene. Şima  vanê qey şima paştî daye şarê Kobanê. Merdimî ameyî qetilkerdene, cinîyan rê tecawuz ame kerdene, cinîyî bazarê koleyan de ameyî rotene, sereyê merdiman ameyî birnayene. Şima DAÎŞî rê çîyêk nêvanê. Şima xeberê ANFyî girwtî sey sey îdîanmeyî vera ma şuxulnenî. Nayî bizanê ke şima se kenê bikerê nêeşkenê pê nê metodan ma têkoşînê ma ra raqilnê.''

Heyetê mehkeme roniştişo bîn 20ê gulane rê peyde eşt.