Paytextê Belçîka Bruksel de roniştişê dewaya ke vera cehdkerdişê sûîqestê vera Hemserekê KONGRA-GELî Remzî Kartal û Endamê Konseya Rayberdişî ya KCKyî Zubeyîr Aydarî ameye akerdene, ame kerdene.

Dewa de Zekerîya Çelîkbîlek, Yakup Koç, Necatî Demîryogullari û Haci Akkulak yenê muhakemekerdene. Haci Akkulako ke eslê xo de kurd o dima ke sey ajanî ame şuxulnayene ferq keno suîqest yeno plankerdene û polîsanê Belçîka rê îtîraf keno. Akkulak vano ke o hetê Demirogullariyo ke sey merdimê karî yeno zanayene ra bi ekîbê suîqestî ameyo naskerdene. Yakup Koç remayo Tirkîya, Zekerîya Çelîlbîlek hema Fransa de yo. Çelîkbîlek û Yakup Koç sey amadekerdoxê planê suîqestî dosya de ca genê.

Têna avûkatê Demiroglularê tewrê roniştişê dewa bi. Dewakarî Zubeyîr Aydar û Remzî Kartal û avûkatê înan Jan Fermon zî tewrê roniştişî bîyî. Avûkat Fermonî bi fotografan tekîlîya selahîyetdaranê Tirkîya û ekîbê suîqestî ramojnayî. Dozgero newe tewrê roniştişî bi. Dozgerî îdîa kerd ke Akkulakî endamê bînî yê ekîbî semedê suîqestî îkna kerdî.  Avukat Jan Fermonî ke ANFyî qisey kerd vat. ''Heme doneyê dosya ramojnenê ke nê vatişê dozgerî ratş nîyo. Pêvînayîşan de eşkera yeno vînayene ke projê hetê Çelîkbîlek û Koçî ra ameyo amadekerdene.'' Zubeyîr Aydarî vera tewirê dozgerî nêrazîbîyîş mojna û vat: ''Keno ma sûcdar bikero. Xora wîjdanê Akkulakî rehet nêbi aye ra xebere daya polîsanê Belçîka.'2  Remzî Kartalî zî qiseykerdişê Akkulak û Çelîkbîlekî nîşan da û vat: ''Çelîkbîlek  bi vatişê 'Ê Parisî zî ma kerd biewne çîyêk nêbi' ke no Akkulakî teşfîk bikero.''

Heyetê mehkeme qerarê xo do 22ê nîsane de bewlî bikero.