Paytextê Belçîka Bruksel de derheqê dewaya ke vera cehdkerdişê sûîqestê vera Hemserekê KONGRA-GELî Remzî Kartal û Endamê Konseya Rayberdişî ya KCKyî Zubeyîr Aydarî ameye akerdene de  konferansê çapemenîye ame kerdene.

Konferano ke Klubê Çapemenîye yê Brukselî (Press Club Brussels) ame kerdene Zubeyîr Aydar û Remzî Kartal ê ke raştê cehdkerdişê sûîqestî ameyî,  avukatê hîrê cinîyan ê şorişgêran ê kurdan Sakîne Cansiz, Fîdane Dogan û Leyla Şaylemez ê ke 2013 de Paris de ameyî qetilkerdene Antonîe Comte, û rojnamegerî Hayko Bagdat û Ekr Acarer ê ke Almanya de surgun de ciwîyenê ci bîyî.

Dewaya ke çar ajanê tirkî tede yenê muhakemekerdene 11ê adare de do bêro destpêkerdene. Roniştişo verên 1ê teşrîna verêne ya 2021 de amebi kerdene. Amebi tesbîtkerdene ke êyê ke ekîbê sûîqestî ca genê tekîlîya înan bi Anqara heta dîrek bi Qesra Serekkomarê Tirkî esta. Netîceya cipersayîşan û îtîrafan de vejîye werte ke Qirkerdişê Parisî ra heta sûîqestê Brukselî torra hîra ya sûîqestan bi destê Anqara Ewropa de gureyena. Reyna fotografê endamanê ekîbê sûîqestî bi şêwirmendanê Erdoganî Adnan Tanriverdî û Prof. Dr. Seyît Serçelîlî estê. Cipersayîşo ke yeno rayraberdene de yeno vînayene ke merkezê tîmanê sûîqestî de Fransa esta la Fransa zanayîş nêdana Belçîka.

Konferans de derheqê cehdkerdişê sûîqestanê ke dewleta tirke yê Ewropa, torrê ajanîye, falîyetê cokdayîşî de raporêko hîra ame teqdîmkerdene.

Kombîyayîş de verî Zubeyîr Aydarî qisey kerd. Adarî bale ante raporê ke çapemenîye rê vila kerde de ser û vat: Demê ravêrtî ra heta roja ma dewleta tirke herra Ewropa de falîyetanê sûîqestî kena. Rapor de heme belgeyê cehdkerdişê nê sûîqestan estê. Şefê SEDATî Adnan Tanriverdî pabesteyê nê falîyetano. Reyna Yakup Koço ke sereyê ekîbê sûîqestî de ca geno Serserfîrîya dewlet tirke ya Parîsî zî tede xeylêk dezgehanê fermîyan ê tirkî rê girêdaye yo. Rapor de fotografê ke tekîlîya endamanê tîmanê sûîqestî û Sersefîrîya Tirkî ya Anqara, Qesre û SEDATî ramojnenê , estê. Bitayberî badê sûîqestê Fransa ê 2013î cipesayîşêko xurt nêame kerdene. Hukmatê Tirkîya wazeno muhalîfanê xo yê Ewropa bêveng bikero. Têna ma nê heme muxalîfî hedef de yê. Ganî welatê Ewropa tedbîran zixman bigêrê.

Avûkat Jan Fermonî zî derheqê dewa de tay zanayîşî dayî û vat:''Çar kesî yenê muhakemekerdene ke nê sey endamanê çeteyanê krîmînelan û rêxistinanê terorîstan yenê sûcdarkerdene.'' Fermonî fotografê endamanê ekîbê sûîqestî selahîyetdaranê tirkan ramojnayî û vat: Ganî welatê Ewropa vera hêrişanê terorîstan ê dewleta tirke tedbîran bîgêrê.

Avûkatê hîrê cinîyan ê şorişgêran ê ke Paris de ameyî qetilkerdene, Antoine Comte zî bale anti tekîlîya kiştox Omer Gunayî û MÎTê Tirkîya ser û vat bêvengîya welatanê Ewropa yê vera falîyetanê krîmînalan ê dewleta tirke nîna qebulkerdene.

Rojnamegerî Erk Acarer û Hayko Bagdat zî bale ante hêrişanê ke înan rê ameyî kerdene ser û vat ganî welatê Ewropa destûr medê hêrişanê dewleta tirke yê vera muxalîfanê ke Ewropa de yê.

Tewr peynî de Remzî Kartalî qisey kerd. Kartalî vat: ''Goreyê selahîyetdaranê tirkan 'meseleya kurdî nê meseleya terorî' esta. Coka bi hezaran kesî tepişteyê. Na polîtîkaya zextî heta tewberê welatî ameye. Rixmê zext û sûîqestan Ewropa dewleta tirke reyde hemkarîya sûcî kena. Yewîya Ewropa û Konseya Ewropa vera sûcanê dewleta tirke yê vera kurdan û muhalîfan bêveng ê. La ma vînenî vera Rûsya wina tênêgêrenê. No sîyaseto dirî yo. Ganî mehkemeya Brukselî qerarêko raşt bîgêro ke vengê kesanê ke demokrasî wazenê bido eşnawitene û verê dewleta tirek bigêro. Reyna  çapemenîya Ewropa zî ganî rolê xo kay bikero û şiro na babete ser.''