Dima ke tîma suîkastî ya tirke hezîrane 2017î de Belçîka de vera Hemserekê KONGRA-GELî Remzî Kartal û Endamê Konseya Rayberdişî ya KCKyî Zubeyîr Aydarî plan kerdêne eşkera bîye û tehqîqatî ra pey derheqê înan de bire daye ke dewa bêra akerdene. Dewa 1ê teşrîna verêne (ewro) dest pêkena û semedê kurdan Ewropa de gamêka verên a.

Muhakemekerdişê Belçîka 2018 de têkoşînê PKKyî sey 'şerê çekdarî yê kurdan' pênase kerdni û vatbi ke merdim nêeşkeno PKKyî rê vajo 'terorîst.'

Destê mehkemeya Brukselî de dosyaya sey bomba esta. Cigêrayoxanê dosya tesbît kerd ke qiseykerdişê telefonê tîme de planê 'gola gonîye' esto. No vate qiseykerdişê telefonî yê Zekerîya Çelîkbîlekî de derbaz beno.

Tîma suîkastî ra Çelîkbîlek û Yakup Koç Fransa de têgêrenê. Wextê kontrolê polîsanê Belçîka de serê Koçî ra nasnameyê polîsê tirkî vejîya. Coka muhakemekerdişê Belçîka polîsanê Fransa reyde têgêra. Polîsanê Fransa telefonê tîma suîkastî goldarî kerdî. Nê goşdarîkerdişan de vejîya werte ke têna Çelîkbîlek û Koç nê komêka merdiman 'kesêkî' reyde qisey kerd. Zubeyr Aydar vano ''Şefê na tîme Yakup Koç o.''

Her ke tehqîqat xorin bi vejîya werte ke xeylêk kesê tîma suîkastî Sersefîrîya Tirkîya ya Parisî reyde têkilîye kenê û na tîme raşta raşte  pabesteyê Qesra Erdoganî ya.

Profîlê endamanê torra suîkastî zî xeylêk balkêş o. La tabloyo peyên cîya yo. Goreyê qeydanê telefonî Yeşîlyurt şino Belçîka. Tîya de Necatî Demîrogullariyo ke zamayê Yakup Koçî yo, pê dokumentanê sexteyan wesayîtêk dano Yeşîlyurtî. Demîrogullari karê lojîstîkî yê tîma suîkaste ra mesuldar o. Demîrogullariyî Yeşîlyurt sey xebatkarê şîrkete mojnayo. Tehqîqat de whatsAppê Demîrogullariyî de kopîyê pasaportî û dokumentê bînî estê. Coka tehqîqatê serê Yeşîlyurtî yeno hîrakerdene.

Îrfan Yeşîlyurto ke 8ê nîsana 2021î de korona ra merdo, wexto ke pê Cronopostî çîyêk şawitêne Îstanbulî kewt binê taqîbê polîsanê Fransa. Goreyê Yeşîlyurtî paketa ci de name û numarayê telefonanê tay kesan estê ke tirk ê û verî Fransa de merdê. Yeşîlyurt wextêk zî kewt verê sîstemê hîşyarîya nimite yê warê Schengenî. Yanî Yeşîlyurt key sînorî ra derbaz beno keweno teqîbê polîsan. Dima bi hawayêkê ecêbî qeydê teqîbanê Yeşîlyurtî ameyî pakîkerdene. Selahîyetdaranê Belçîka ê Fransa ra persê na rewşe kerd la fransizan cewab nêda ci û îdîa kerd ke Yeşîlyurtî semedo ke kafeyêk de pêrodayîş kerd înan o teqîb kerd.

Perwerdeyo taybet girewto

Tîme de keso bîn zî Samî Koç o ke birazîyê Yakup Koçî yo. Keso bîn zî bi nameyê xo yê qodî 'Avnî' yo. Polîsê Fransa wextê teqîbî de pê hesîyenê ke nê kesan perwerdeyo taybet girewto çunke eşkenê goşdarîkerdişê telefonî asteng bikerê.

Eşkera bi ke merkezê tîma suîkastî ya Belçîka Fransa ya. Nê kesî pêro têkilîya înan a bi Sersefîrîya Tirkîya û Anqara esta. Qeydanê telefonî de têkilîya kesanê bi nameyê Yeşîlyurt û Mustafa Kesînî yê bi Sersefîrîya Tirkîya bale ancena.

Fotografêko zaf girîng: Tanriverdî û SADAT

Dosya de fotografêko zaf girîng esto ke telefonê Çelîkbîlekî ra vejîya. Tehqîqat de Çelîkbîlekî vato ke fotograf hetê Yeşîlyurtî ra ameyo girewtene. Fotograf de Yeşîlyurt werte de yo. Goreyê ey nînan ra kesêk merdimê ci yo la o kesê bînî nêşinasneno.

Keso ke Çelîkbîlekî vato o nêşinasneno tehqîqat de ame destbîtkerdene. No kes Adnan Tanriverdî yo û Tirkîya de hol şinasîyeno. Tanriverdî ronayoxê Şîrketa Şêwirmendîye ya Pawitişî ya Mîyanneteweyî (SADAT) o û şewirmendê Erdoganî yo. Tanriverdîyî 30 serrî Serekîya Dayîreyê Şerê Taybetî ya Tirkîya de wezîfe kerd û hetê bînî ra Serekîya Teşkîlatê Pawitişê Sivîlî yê KKTCyî kerde. Tanriverdîyî Akademîya Herbê Erdî de dersî dayî ke Wezîtê Pawitişî yê Tirkîya Hulusî Akara wendekaranê ci ra yew bi. Têkilîya Tanriverdî û Erdoganî 28ê sibate de zêdîyaye. 'Xîretê Darbe' yê 15ê temmuza 2016î ra dima Tanriverdî waştişê Erdoganî ser o bi şewirmendê ey. Kanûna 2019î de Tanriverdîyî Kongreya Yewîya Îslamî ya Mîyanneteweyî de vat 'Ganî ma amadekarîya xo semedê ameyîşê Mehdîyî bikerê.' Nê vateyî ser o nêrazîbîyayîşan ra dima Tanriverdîyî 8ê çeleyê 2020î de şêwirmendîye û wezîfeyê Endamê Heyetê Asayîşî û Polîtîkaya Teberî ra îstîfa kerd.

SADAT 28ê sibata 2012î de ronîya. Nika 22 welatanê misilmanan de 64 şêwirmendê ci estê. SADAT tewrê perwerdeyê cerganê Sûrîye beno, bi rehetî eşkeno şoro kampanê leşkerîyan ê tirkan. 2016-2017, 2018 de SADATî operasyonanê îşxalî yê 'Firat Kalkani' û 'Zeytin Dali' de şêwirmendîya cergan kerde. Yeno vatene ke Tokat û Konya de kampê SADATî estê. Nê agahîyan ra ber xebatê raştikênî yê SADATî yenê nimnayene.

Yeno îdîakerdene ke SADAT semedê asayîşê hukmatanê welatanê misilmanan xebitîyeno, mabênê nê hukmatan û Tirkîya de mabênçîtîye keno, perwerdeyê taybetî dano leşkeranê nê hukmatan. SADATo ke sey Gladyoyê neweyî yê Tirkîya dîyeno teber û zereyê welatî de operasyonan keno, semedê operasyonanê MÎTî sey perdeyî şuxilîyeno.

SADAT Ewropa de çi kar keno?

Nê agahîyî têna zanîyenê. La SADAT Ewropa de çi kar keno? Tanriverdîyî 2018 de Erdoganî reyde Paris zîyaret kerd. Mîyanê heyetê fermî de nameyê ey çinbi. Nêzanîyeno ke Tanriverdîyî wextê zîyaretî de çi kar kerdo, kamî reyde qisey kerdo.

Fotografêko bîn: Seyîd Sertçelîk

Wexto ke Erdoganî Paris zîyaret kerd keso bîn zî nêzdîyê ci de bi: Seyîd Sertçelîk yanî şêwirmendê Serekkomarî û Endamê Heyetê Polîtîkaya Asayîşî yê Serekkomarîye Prof. Dr. Seyîd Sertçelîk.

Gulana 2018î de wextê îşxalê Efrînî de Sertçelîkî fotografê zîyaretê xo yê zîndanêkî facebook de pare kerdo. La fotografê bînî yê nimite estê ke zêdêr bale ancenê.

Yew fotograf de o Paris de Çelîkbîlekî reyde yo, fotografê bînî de zî Anqara de Keskîn û Koçî reyde yo. Nê hîrê kesan Anqara de buroyê Qesra Erdoganî de Sertçelîk zîyaret kerdo. Çelîkbîlekî îfadeyê xo de vato ke ey Paris de Seyîd Sertçelîkî rê kilawuzîye kerda coka Sertçelîkî zî Anqara de ci rê kilawuzîye kerda la ey nêzanayêne ke uja qesra Erdoganî bi.

Waştişê ateşeyê leşkerî

Telefonê Çelîkbîlekî de kaxidêk û fotografê ateşeyêkê leşkerî yê Sersefîrîya Parisî estê. Goreyê îfadeyê Çelîkbîlekî no ateşeyo pê endamîya FETOyî sûcdar beno kaxidêk dano Çelîkbîlekî û tira wazeno ke no kaxid wa bido Erdoganî. Eke Çelîkbîlek têna xebatkarê ceyranî yo senî ateşe tira çîyêkê winasênî wazeno? Bi kilmî ateşe zî zaneno ke Çelîkbîlek raşta raşte pabesteyê Erdoganî yo.

Agahîyî têna pê nînan sînordar nîyê. Polîsê Fransa wayîrê agahîyan ê zêdeyan ê la înan zaf tay agahîyî Belçîka reyde pare kerdî. Hetê bînî ra persêko girîng no yo ke nê kesî çira hetê Fransa ra nêameyî muhakemekerdene yan zî nerehetkerdene.Zîyaretê Parisî yê Tanriverdî û Sertçelîk do bêrê roşnîkerdene.

Aydar: Dosyayêka hewt hezar rîpelan esta ke resena Erdoganî

Zubeyîr Aydar vano dewleta tirke teberê Tirkîya de rêxistinêka sûcî awan kerda. Aydarî vat: ''Verê destê înan de dosyayêka bi hewt hezar rîpelan esta. Na dosya de şebekeya sûcî yena deşîfrekerdene. Planê suîkastî deşîfre bîyê û eşkera yo ke nê planî resenê MÎT, Erdogan û hukmatê Tirkîya.''

Dewa heta kamca şina nêzanîyeno. La çimeyê ke nêzdîyê tehqîqatî yê vanê milîmetreyêk mendo ke biresa ê cêr û corî. Pey de na perse manena: Dewa do biresa ê corî?