Derheqê cehdkerdişê suîkastî yê vera Hemserekê KONGRA-GELî Remzî Kartal û Endamê Konseya Rayberdişî yê KCKyî Zebeyîr Aydarî de tehqîqatê Belçîka qedîya û bire dîyaye de dewa bêra akerdene.

Tehqîqat de delîlî resenê Anqara. Wextêkî ra nata dosya ser o bira nimite estbîye. Goreyê agahîyanê çimeyan Dozgerîya Belçîka verî nêwaşt dewa abikera. 27ê nîsane de zî bira nimitebîyayîşê dosya hetê Mehkemeya Huqûqî ya Eslî ra wedarîya la ameye taloqkerdene.

Roniştişê peyênî yê 21ê gulane de semedê birdayîşî tarîxê 18ê hezîrane ame weçînayene. Roniştiş de bire dîyaye ke dewa bêra akerdene.  Roniştişo verên 1ê teşrîna verêne de yo.

Na bire Ewropa de gamêka newîye û yew a. Tîma suîkastî ya tirke reya verêne do bêra muhakemekerdene. Goreyê çimeyanê ke nêzdîyê dosya yê, tehqîqat de delîlê zaf giranî ameyî destvistene û delîlî resenê Anqara.

Merkez Fransa ya

Merkezê tîma kiştişî Fransa de yo. Goreyê agahîyanê ke ameyî destvistene torra ajan û kiştoxan a Anqara Paris de ya û hayîya selahîyetdaranê Fransa pê ney esta. Agahîyê ke selahîyetdaranê Belçîka Fransa ra waştê heta astêke dîyaye. Qeydê telefonî, fotograf û dokumentê şikdarî têkilîya înan eşkera kenê û mojnenê ke ê raşta raşt pabesteyê Qesre yê.

Tehqîqat de nameyê xeylêk kesan vejîyenê verî. Nînan ra di tenî Zekeriya Çelîkbîlek û Yakûp Koç ê. Çelîkbîleko ke leşkero verên bi herêma Parisî de maneno. Yakup Koç zî şîyo xeylêk welatanê Ewropa.

Hezîrana 2017î de wesatîtêko reş ê bi markaya Mercedecî wexto ke dormeyê bînaya Kongreya Neteweyî ya Kurdîstanî (KNK) ya Brukselî de keşf kerdêne ame tesbîtkerdene û vindarnayene. Tede Çelîkbîleko ke nameyê 'albayî' şuxilneno, Yakup Koço ke ede nasnameyê polîsê tirkî estbî û ajan Haci Akkulako ke 'eslê xo de kurd bi' estbîyî. Akkulakî wexto ke fam kerd mesele resena asta suîkastî selahîyetdarê kurdî hişyar kerdî û polîsanê Belçîka rê hemkarîye kerde. Kesê bi nameyê Necatî Demîrogullari zî pê hetkarîya lojîstîkî ya tîme yeno sûcdarkerdene. Demîrogullari zamayê Yakup Koçî yo.

Tehqîqat de nameyê xeylêk kesan û têkilîya înan a bi îdarekaranê 'payeberzan' ê Tirkîya ameyî tesbîtkerdene. Semedo ke dosya ser o bira nimite esta agahîyî nênê eşkerakerdene.

Labelê ANFyî 25ê adara 2021î de fotografê ke Zekerîya Çelîkbîlekî salona qesra Beştepe ya Erdoganî de û Sersefîrîya Tirkîya ya Parisî de girewtbî weşanayî.

Nînan ra yew fotograf de Çelîkbîlek û Sefîro Berzo verên ê Tirkîya yê Fransa Îsmaîl Hakki Musa pîya yê. Tehqîqatê Belçîka de nameyê Musayî sey 'koordînator'î derbaz beno.

Musayo ke selahîyetdaranê tewr payeberzan ê MÎTî ra oyo diyîn bi, dima ke gumanê derheqê ci de zêdîyayî 14ê adare de wezîfeyê sersefîrîye qedîna û agêra. Musa çeleyê 2013î de wexto ke 3 cinîyê kurdî yê şorişgêrî ameybî qetilkerdene MÎT de wezîfedar bi.

Siba: Merkezê Tîma Kiştişî ya Tirke Fransa de yo û raşta raşte pabesteyê Qesre yo.