Aras Hac Alî dewa Cewzatî ya Dirbêsî ra yo. Teşrîna verêna serra 2018î de embazê xo reyde şi Herêma Babê ke hetê dewleta tirke û cerganê ci amebi îşxalkerdene. Aras Hac Alî leşkerîya herêmanê Îdareyê Xoserî ra rema û xîret kerd ke şoro Tirkîya la kewt destê cergan. Hêverî Lîwa Nuredînî yê Tumenê Hamzatî de dima zî mîyanê cerganê Sultan Muradî de ca girewt. Wexto ke firsend dî Serêkanîyê ra rema û 27ê nîsana 2020î de teslîmê QSDyî bi. Aras Hac Alîyî qala rewşa Bab û Serêkanîyê kerde.

Aras Hac Alîyî vat: ''Hêrişê vera Serêkanîyê û Girê Sipî ra verî amadekarîye amebî kerdene. Ma şîyî perwerde bivînê. Dima ke amadekarîye qedîyaye fermandaranê tugayî vat ke Tirkîya tay pere dana la her çi serbest. Çi kewt destê ma ma eşkîyayêne xo rê berê. Vat çîyêk meverde efû mekerê.''

Aras Hac Alîyî 15ê çeleyê 2019î de pê waştişê xo sey endamêkê cergê Firqê Hamzatî Babê ra derbazê îşxalê Serêkanîyê bi. Dima zî tewrê Sultan Muradî bi. Aras Alîyî vat: ''Mi Serêkanîyê de zaf çîyê xirabî dîyî. Roniştoxanê Serêkanîyê seba ke cergan ra tersayêne koçê Hesekê kerdbi. La cergan keyeyan ra her çi dizna. Ber û paceyî zî dizîyayî.Serêkanîyê de tay kokimî mendî. Înan rê tedaya giran ameyêne kerdene. Seba ke ez kurd a mabênê mi û cergan de alozîye vejîyaye. Vatêne 'Seba ke vera kurdan şer bikerê ma ameyê.' Wexto ke tay roniştoxî Hesekê ra agêrayî ameyî tepiştene.  Seba fîdye merdimî ameyêne remnayane. Serêkanîyê de cuye aram nêbîye.''

Aras Hac Alîyî da zanayene ke wexto ke herêmê îşxalkerdeyî de çîyêk nêmend ke bêro talankerdene pê waştişê dewleta tirke pê bedelê 2 hezar dolarî cergî şîyî Lîbya û vat: ''27ê nîsana 2020î de ez Serêkanîyê ra remaya û teslîmê QSDyî bîya. O çax mi dî ke 300 kesî Serêknaîyê ra şîyî Lîbya. Herêma Babê ra zî 4-5 hezar kesî şîyî Lîbya. Înan ra xeylêk kesî Lîbya de kişîyayî.''