MGKyo ke serkêşîya Erdoganî de kom bi, hêrişê tebersînorî pawitî û da zanayene ke ê do hêrişanê neweyan bikerê.

Heyetê Mîllî yê Tirkî (MGK) serkêşîya Serekkomarê Tirkîya Erdoganî de kom bi. Kombîyayîş 7 madeyan ser de vindert. Vilawekê kombîyayîşî de ame vatene ke hêrişê vera Başûrê Kurdîstanî do dewam bikerê û hêrişê neweyî zî do dest pêbikerê.

Vilawekê MGKyî wina yo:

''-Sere de PKK/KCK-PYD/YPG, FETO û DAÎŞ rêxistinê terorî û operasyonê vera pêro tehlukeyanê serê yewîya milî, derheqê înan de agahîyî ameyî dayene û tedbîrî ameyî nîqaşkerdene.

-Têgêrayîşê vera Başûrî seba asayîşê sînoranê ma yê teberî lazim o. Çi teber de çi zere de seba pawitişê sînoranê ma yê teberî têgêrayîşê winasênî do dewam bikerê.

-Tirkîya mutefîqanê xo ra mesuldarî û samîmîyet wazena. Welatê ke bi zelalî paştî danê terorîzmî ganî tewirê xo ra fek vera bidê û ma venga înan danê ke hesasîyetê asayîşê Tirkîya ser o vinderê.

-Şerê Ukrayna û Rûsya de ganî adirbirnayîşêko hîra bêro îlankerdene. 

-Yunanîstan Dengizê Ege de huqûqê mîyanneteweyî û peymanan binpay keno, goreyê hişmendîya hemkarîya mutefîqan tênêgêreno. Seba pawitişê heq û menfaatê miletê ma xîretê ma bi qerardarî û bê tawîz do dewam bikerê.

-Welatê ke dişmenîya Îslamî kenê ma qerqilnenê. Seba astengkerdişê ney çi bikewo milê ma, ma do bikerê.

-Seba îstîkrarê Lîbya gamê pawitşê yewîya erdê ci û şarê ci do dewam bikerê.''