Endama Koordînasyonê PAJK’î Koçerîn Amede derheqê şaredarîya azade, sebebê bingeyênî yê îdeolojîkî yê virazîyayîşê ci, modelê ci yê organîzebîyayîşî û hêrişanê dewlete yê serê şaredarîyanê azadan de qisey kerd. 

ŞAREDARIYA AZADE ÇI YA

Amede da zanayene ke şaredarîya azade xoserîya demokratîke xo rê esas gêna, çunke Neteweyo Demokratîk wayîrê a hişmendîye yo ke xo seperneno îdareyanê xoseran û vat, zengînîya cîyayîyan û yewîya ê ya azadkerdoxe, bi a rastekînîya ke serê zemînêkê xoser û azadî de vejêne werte û goreyê nê xo dîzayn keno. Amede vat çarçewaya xoserîya demokratîke perspektîfê organîzasyonê cimatkî ser o ameya ronayene û vat, “Merheleya pratîke de temsîlê heme şaranê cayîyan bica ana, zafziwanîye xo rê kena amac û xizmetî kena. Hişmendîya aye ya serekeye sîstemê hemserekîye yo. Bi sîstemê hemserekîye, bi organîzasyonîya xosere a cinî mucadeleyê cinsîye xorînêr kena, kena vila û hetê cimatkî ra hişmendîya azadkerdoxe xurt kena. Na şaredarîye metod û wesîteyanê şaredarîya klasîke ke yewhukmîya îqtîdarî pê xo sazî kerdo, beşanê aye yê elîtî û burokratîkî ke xo sepernenê mewqî û meqaman û şarî ra aqityaye yê werte ra wedarena. Xo rê cuyêka xozayîye, takekes-cimat, cinî-camêrd, ciwan-doman, astengbîyaye-kokim, yewîya kulturkîye û bawerîye, yewî û cîyayî ya seypêyîye kena amac û kena ke cimatêkê winayênî awan bikero. Şaredarî û cuyêka wina ya ke merdimî mexdûr nêbenê, teber de nêmanenê.”

TEMSÎLÎYETA SEYPÊYE Û HEMSEREKÎYE

Koçer Amede bale ante muhîmîya temsîlîyetê seypêyî û hemserekîya ke wayîrê hişmendîya şaredarîya azade ya ser û vist vîrî ke mucadeleyê cimatê demokratîkî û dereceya organîzebîyayîşê ci, dibendîya serdestî-koledarîye ya cinî û camêrdî xo pey de verdana û bena sebeb ke serê zemînê hemcuya azade de nasname bêro destfînayene. Amede vat, “Hişmendîya ke na şopa mucadeleyî rê wayîr vejêna, xo rê kena amac ke hişmendî û sazîbîyayîşê sîstemê hemsrekîye û temsîlîyetê seypêyî awan bikero û nê bica ardo” û dewam de wina vat, “Na yewe ra zî wareyê cuya cimatkîye, heme merheleyan de keno ke na hişmendîye bi teşebusê xo yê temsîlîyetê seypêyî rono.   ”  

Amede serê hedefê sîstemê hemserekîye û şaredarîya azade de zî vat, ''No sîstem xo rê amac keno ke organîzebîyayîşê cimatkîyî yo ke serê koordîneyî, yewbînan temamkerdişî û koordînasyonê kar û rolan ser o awan bîyo rono, tewrbîyayîşê cinî biresno merheleya tewr berze, bi destpêkerdişê kulturê demokratîkî û demokrasîyî, hemserekîye hemeyê cimatî de vila bikero.''

EKOLOJÎ Û ŞAREDARÎYÊ AZADÎ

Endama Koordînasyonê PAJK’î Koçerîn Amade vat ke ekolojîkbîyayîşê şaredarîya azade yo ke hemserekî û temsîlîyetê seypêyî dayê xo ver, yew taybetmendîya ê ya temamkerdoxe esta û wina vat, “Bi awankerdişê cuya cimatkîye û ekolojîke, bi awankerdişê hemsencîya xoza-merdim, merdim-xoza, bi organîzebîyayîşê cuyanê alternatîfan, bi qasê aqilî ca dano hîsan zî û zemînanê cimatkî û mekankîyan awan keno, wareyanê cuye de cayanê helmgirewtişê awan keno. Xonewekerdişê xoza, cimatî û merdimî sey ercêkê esasîyî qebûl keno.”

Amede dewamê qiseykerdişê xo de vat Rayberê Şarê Kurdî Abdullah Ocalan gama ke serê îdareyanê cayîyan de vindeno, înan sey têgêrayîşê xelisnayîşê dinya şîrove keno, sey sîstemêk ke cimat bi ê xo rayra benê û qeraranê xo danê û bica anê pênase keno.  

DEWLETE ÇIRA HÊRIŞ BENA SERÊ ŞAREDARÎYANÊ AZADAN

Amede tewr peynî de vat şaredarîya azade ya ke serê esasê paradîgmaya demokratîke, ekolojîke û azadîperwerîya cinî de ronîyaya, serê hişmendîya îqtîdarê camêrd-serdestî de zextêkê giranî kena û cîyayîya xo ramojnena. Amede wina vat, “Tam nê halî de gama ke şaredarîyêk bi hişmendî û pratîkêkê eksê nê de vejêna werte, nê çîyî xo rê kena sebeb ke hêrişan bero serê şaredarîyan azadan û dest bido serê înan. Şaredarîyê azadî, ganebîyayîşê hişmendîya îdareyê cayîyî yê û serê bingeyê Neteweyê Demokratîkî de şaredarîya cayî ya ke xo sepernena xoserîya demokratîke. Bi goreyê rastîya ke şaredarî cewherê xo de îdare û sazîyêka şarî ya, do hişmendîya îqtîdarperwere ya dewlete û sazîbîyayîşê a hişmendîye ra xo xilas bikero û bibo hişmendîya ke a resneno rastîya xo.”