Zîndanê Tîpê Yyî yê ke 13 cayan de ameyê akerdene, tede tecrîdo mutlaq yeno caardene, wextê hewagirewtişî saetêke û nême yo û heqê tepişteyan yenê binpaykerdene.

Komîsyonê Zîndanan ê Komeleya Huqûqnasanê Modernan (ÇHD) çend rojî verî raporêk amade kerd û tede Zîndanê Tîpê Yyî wina pênase kerdî: ''Zîndanê Tîpanê Y, S û Bi Asayîşê Berzî modelê winayên ê ke tede tecrîd hîna giran yeno caardene.''

Endamê Îdareyê ÇHDyî Naîm Emînogluyî da zanayene ke seba ke dewleta tirke Zîndanê Tîpê Fyî ra armancê xo nêvisto destî verê xo dayo zîndanê Tîpê Yyî. Emînogluyî vat: ''Nameyê ci bivurîyo zî serra 2000î ra nata sîstemê tecrîdî zîndanan de yeno caardene. Zîndanê Tîpê Fyî seba ke 'waştişê dewlete' mird nêkerd nê zîndanî kewtî dewre. Nika 7 Zîndanê Tîpê Yyî, 10 Zîndanê Tîpê Syî est ê û nînan de 10 hezar tepişteyî manenê. Yanî 10 hezar tepişteyî bine tecrîdî de yê. Dewlete bi awankerdişê nê zîndanan îtîraf keno ka Zîndanê Tîpê Fyî hînî ci rê nêvejîyeno. 

Dewlete raşta raşte nê zîndanan rê nêvana 'Tîpê Yyî, Tîpê Syî.' Binê nameyê 'Zîndanê Bi Asayîşê Berzî' şarî xapînena. Nê zîndanî awanîyê pîl ê. Tede tepişteyî hucreyanê yew kesî de tepişîyenê, tepişteyî nêeşkenê pîya şorê warê hewagirewtişî û wextê hewagirewtişî teyna saetêke û nêm a. Nê zîndanan de xeberê tepişteyan yewbînan ra çin ê. Nê zîndanan de pêvînayîşê bi avûkatan zî pê kamerayan yenê qeydkerdene. Reyna nê zîndanan de hewa û tîje nêkewenê hucreyan. Yanî nê zîndanan de tepişteyî hêdî hêdî kişîyenê. Wezîrîya Edaletî zî derheqê nê zîndanan de yew agahîye nêdana. Bi nê hawayî sîstemê tecrîdî yeno vilakerdene.''

Komîsyonê Zîndanan ê Komeleya Huqûqnasanê Azadîwazan raporê xo yê serê nê zîndanan de pare kerd ke dewleta tirke wazena ke nê zîndanan reyde sîstemê tecrîdî bikera sîstematîk, mende û vila.