Parlamentera HDPyî ya Îstanbulî Dilşad Canbaza ke derheqê qetilkerdişê Denîze Poyraz û hêrişê vera HDPyî de ANFyî rê qisey kerd eşkerayîye sey ''Provokasyon'' sey hêrişê sîstematîkî hesibnayî.

Canbaze bale ante muhîmîya têhet de vindertişî ser û vat ê do kuçeyan cameverdê. Canbaze vat: ''Ma ewro heme bajaranê Kurdîstan û Tirkîya de semedê Denîze kuçeyan de bê. Ma do protestoyan rê dewam bikerê û kuçeyan ra peyser amegêrê. No serebût ganî provokasyonî ra zafêr sey hêrişê sîstemkîyî bêro destgirewtene. Denîze Poyraze netîceya propagandaya reşe ya vera HDPyî de ameye qetilkerdene. Heme televizyon, kanalan û meydanan de HDP sey hedef yeno ramojnayene. Yew meng a ke Dewaya Kobanê esta. Qetilkerdişê Poyraze ra rojêke verê cu grûbêke waşt debikewo salona mehkema ya Sîncanî. Mirênayîşê Poyraze cînayet nê qirkerdiş o. Na meseleyêka şexsî ya qesasgirewtiş nêya. Hêrişêko sîstemkî û plankerde yo ke bi destê dewlete ame kerdene.''

Cembaze ard ziwan ke ê do çirey waştişê haştîye û azadîye cameverdê û vat nika hetê demokratî yê ke teberê HDPyî de yê ganî wezîfeyê xo bîyarî ca. Canbaze vat: ''Hêrişê vera Denîze Poyraz têna vera HDPyî nêyo. No hêriş vera demokrasîyî yo. Şexsê Denîze Poyraz de demokrasîyî rê gule ame eştene. Sere de partîyê muxalefetî ganî rêxisitinê komelê sîvîlî û heme dezgeh û sazgehî vejîyê meydanan. Ganî ma têhet de vinderê. Ne dewaya qefilnayîşê HDPyî ne zî qetilkerdişê Denîze tesaduf o. Ma zanê ke no tîya de zî do memano. Coka wextê ci yo ke ma bêrê têhet. Guleyo ke ma rê ame eştene beno ke siba înanê ke vera nê hêrişê vengê nêvetê rê bêro eştene. Hêriş do dewam bikero. Ez veng dana ke wa her kes vejîyo kuçeyan ke ma na polîtîkya tersnayîşî bin bifînê.''