Platformê Kede û Demokrasîyî yê Mêrdînî bi çalkîyêke hêrişê vera ziwan û kulturê kurdkî protesto kerdî. Wekîla DEM Partî ya Mêrdînî Salîha Aydeniz û Bêrîtanê Guneş zî tewrê  çalakîye bîyî. Çalakîye de  pankartê “Zimanê me rûmeta me ye. Çanda me hebûna me ye” ame akerdene û dovîzê kurdkî ameyî kiriştene.

Eşkerayîye vera hêrişanê serê ziwan û kulturê kurdkî nêrzabîyayîş ame mojnayene û ame vengdayene ke wa vera nê zextan şarê kurdî zafêr wayîrê ziwan û kulturê xo bivejîyo têkoşînî xurtêr bikero.

Salîha Aydeniz zî nê vatî: ''Sey Mêrdînî Tirkîya de zî zaf ziwan, din û kultur est ê. Ganî na zengînîye bêra pawitene. No sîstem dişmenê şaran, ziwanan û kulturan o. Çunke çîyo ke no hukmat û îdare bidê nê şaran çîn o. Ewro kaos bi krîzan dewam keno. Bi hêrişkerdişê kurdan vanê qey ê eşkenê nê prosesî xo dima biverdê. La ma tîya ra reyna vanê nê kerdişê înan têna krîzan girdêr kenê. Heta ke kurdkî bibo ziwanê perwerdeyî ma do tim her ca de her hele têkoşîn bikerê.''

Reyna Anqara û Îzmîr de zi bi çalakîyan hêrişê vera ziwan û kulturê kurdan ameyî protestokerdene û semedê xurtkerdişê têkoşînî ame vengdayene.