Rayberê Şarê Kurdî Abdullah Ocalanîyo ke Zîndanê Îmraliyî de yeno esîrkerdene, ey ra 41 mengî yo qet xeberêke zî nêna girewtene. Rixmê ney zî Komîteya Vergirewtişê Îşkenceyî (CPT) vera nê tecrîdî erkanê xo nêana ca. Dinya ra xeylêk  roşnvîr, akademîsyen, nuştox û sîyasetmedaran mektubêke şawite CPTyî û venga ci da ke cade Îmraliyî zîyaret bikero.

Îmzadaranê na mektube ra yew akademîstenê Zanîngehê Bremenî Dr. Rolf Gossnerî ANFyî rê qisey kerd.

Gossnerî bale ante Hmleya 'Abdullah Ocalanî rê Azadîye, Meseleya Kurdan rê Çareserîya Sîyasîye' ser û vat: ''Ma çarçewa na hemle de mektube şawite. Ma sey Torra Paştdayîşî ya Almanya CPTyî ra cewabêk girewtç  CPTyî tewr peyên êlula 2022yî de Îmrali zîyaret kerdo. Cewabo ke CPTyî da ma qîm nêkena. CPTyî vat ke 'ma bê destûrê meqamanê Tirkîya nêeşkenê cewab bidê.' Yanî CPT binê tesîrê meqamanê Tirkîya de yo. 

Wextê ci ameyo ke CPT şert û mercanê heqanê merdiman ê Îmraliyî şermezar bikero. CPT rewşa Abdullah Ocalanî û tepişteyanê Îmraliyî bi qîmê nêercneno. Ganî CPT gamanê hîna zelalan bierzo û şert û mercanê tecrîdî zî bi hawayêkê bêterefî cibigêro. Tirkîya sey endamêka Konseya Ewropa morê xo dayo binê Peymana Heqanê Merdiman a Ewropa coka nêbo ke goreyê krîteranê peymane tênêgêra.

Kêmasî û binpaykerdişê cidîyî yê hukmatê tirkî est ê. Bi belgeyan ame îsbatkerdene ke dewleta tirke bi mengan tepişteyan erzena hucreyê yewkesî. Seke nimûneya Ocalanî de dîyeno destûr nêdîyeno pêvînayîşê keye û avûkatan. Bi nê hawayî Tirkîya biranê Mehkemeya Heqanê Merdiman a Ewropa zî çin hesibnena. A raşte  Tirkîya Îmrali de qanûnan nêşinasnena''

Dr. Gossnerî pare kerd ke înan mektuba xo de waşt ke wa CPT şert û mercanê zîndanan teqîb bikero, kerdişanê xiraban asteng bikero û vat: ''Heqê CPTyî est o ke bi hawayêkê bêsînorî şoro zîndanan û bi serbestî cigêrayîşan bikero. Ancî CPT eşkeno zîyaretanê xo de tepişteyan de qiseyn bikero û wextêkê kilmî de zîyaretanê ad hoc (armancê taybetî) bikero. Coka CPT eşkeno wextêkê kilmî de heyetêkî bişawo Îmraliyî. La heyf ke CPT wina tênêgêreno. 

Ganî bêro persayene ke gelo CPT tedayanê Tirkîya ra erkanê xo verê Zîndanê Îmraliyî de nêano ca? Wextê ci ameyo ke Tirkîya binpaykerdişanê xo yê heqan de têrî bêro. Meclîsê Parlamenteran ê Konseya Ewropa 2021 û 2023 de seba caardişê tedbîran tedaya Tirkîya kerdbî. Sey Rûsya Tirkîya zî eşkena xo Konseya Ewropa ra veja û caardişê Peymana Heqanê Merdiman ra azade biba.''