Serekê Komeleya Kulturî ya Pîr Sultan Abdalî Cuma Erçeyî bi wesîleya Qirkerdişê Sêwasî (Madimakî) yê 2yê Temmuze ANFyî rê qisey kerd. 

Cuma Erçeyî ard ziwan ke keyeyanê qurbananê Qirkerdişê Sêwasî komîsyonêk awan kerdo û no komîsyon seba ke qirkerdiş nêro vîrakerdene, dewa bêra teqîbkerdene xebitîyeno. Erçeyî vat: ''Ma Anqara de kombîyayîşêko pîl kerd, kitabxaneyêko dîjîtal awan kerd. Nê kitabxaneyî de agahîyê taybetî yê serê qirkerdişî est ê. Nika muzeyêka dîjîtale yena awankerdene. Seba serra 30. fîlmo dokumenter ame amadekerdene. Ma şîyî zîyaretê keyeyanê qurbanan. Ma Hêzanê Kede û Demokrasî yê Sêwasî reyde kombîyayîş kerd. Ma peyê ê edaletî de yê ke 30 serrî yo nêameyo caardene.''

Erçeyî da zanayene ke Qirkerdişê Madimakî teyna meseleya elewîyan nîya; meseleya komelê Trikîya ya û no qirkerdiş vurîyayo tradîsyonêkê dewlete. Erçeyî îfade kerd têkoşînê bêmabênî yê hêzanê demokrasî ra ber çareyêka bîne çin a û vat: ''Eke na dewlete hesabê Qirkerdişê Mereşî bidîyêne û tede têrî bîyêne Darbeya 12ê Êlule nêbîyayêne. Eke komel Madimak de têrî bibîyêne Gazî nêbîyayêne. Eke Gazî de têrî bîyayêne Qirkerdişê Roboskî, Pirsûs û Garî nêbîyayêne. Seba ke sey Sêwasî qirkerdişê neweyî bêrê kerdene binge yeno amadekerdene. Coka hesabpersayîş teyna meseleya elewîyan nîya. Ganî nê sîstemê qirker, kolonyalîst, cîyakerî ra hesab bêro persayene. Xizanî, vêşanîye, kiştişê cinîyan, tecawuzê vera domanan, çimeyê nê pêroyîyan yew o. Pêro zî seba ke nê welatî de demokrasî çin a qewimîyayê.''

Erçeyî venga her kesî da ke tewrê aktîvîteyanê yadkerdişî yê qurbananê Qirkerdişê Sêwasî bibo û vat: ''Ma seba 2yê temmuze amade yê. Ma muracatê xo yê fermîyî kerdî. Ma tedbîrê xo yê asayîşî girewtî. Ma pêro cananê xo ra wazenê ke bêrê Sêwasî. Ma pîya hesab bipersê. Teyna pê qiseyê 'ma xo vîr a nêkerd' nêbeno. Ma do pîya hesab bipersê.''