Hemserekê Komeleyanê Elewîyan ê Demokratîkan (DAD) Mustafa Karabudakî bale ante problemanê komelê elewîyan ser.

Mustafa Karabudakî wina vat: Gerek dewlete heme bawerî û şaran rê seyyewbînî nêzdî bo û qanûnê bingeyî de heqê her kesî bêro dayene. Problemê elewîyan têna çarçeweya seyyewbînîye de yenê çareserkerdene. Dewlete kena ke  komelê elewîyan û Cemxaneyan krîmînalîze bikero. Hema hema her roje bi bahaneyanê cîya cîyayan cemxaneyî gerîyenê binê ablûqa. 

Bitaybetî elewîyê kurdî hetê bawerî, ziwan, tewirê cuye de cîya yenê tepiştenê, sey komelêkê bînî yê. Mesela elewîyî nêeşkenê kar bivînê. Sektorê taybetî de zî hinî îqtîdar mudaxale keno. Kenê ke elewîyan bi vêşanîye terbîye bikerê, ci rê çok bidê dayene û bikerê sey xo. Bi qanûnê peyênî yê torbayî mudaxaleyê cemxaneyanê ma kerd. Ma no qebul nêkerd. 

Eke ti bibe elewîyê înan, mesele çîn a, heme îmkanê dewlete teqdîm kenê. Eke ti bibe xo, vera înan bivejîyê, hêriş kenê. dewlete kena ke binê nameyê hetkarî ke bikewo cemxaneyan. Bitaybetî rolê şaredarîyan CHPyî zî tîya de gird o.Xora dîyanet wina yew dezgeho ke polîtîkayanê asîmîlasyonî afirneno û şerê leyminî yê dewlete meşrû keno. Gerek dîyanet cade bêro wedaretene û dezgehêko heme bawerîyan seyyewbînî vîneno bêro ronayene. 

Gerek statuyê cemxaneyan bêro naskerdene. Gerek  heme şarî bieşkê bi ziwanê xo dayîke xo perwerde bivînê û bi ziwanê xo bawerîya xo biciwîyê. Gerek heme rengî goreyê bawerîya xo biciwîyê. Elewîyî walî, qaymeqam û wezîrê karanê zerrî ra çîyêk nêwazenê. Elewîyî komelê riza yê. elewîyî gerek loqmayê bêriza qebul mekerê. Elewîyî wazenê heme şarî bawerîya xo azad biciwîyê.”