Çarçewa Hemleya 'Abdullah Ocalanî rê Azadîye, Meseleya Kurdan rê Çareserîya Sîyasîye' de mabênê 11-15ê sibate de Rayraşîyayîşê Enternasyonalîstan şaristanê Baselî yê Swîsre de amebi kerdene.

Beşdaranê rayraşîyayîşî ra aktîvîstê fransayîjî Elio Marseilleyî ANFyî rê qala paradîgma û felsefeya Rayberê Şarê Kurdî Abdullah Ocalanî kerde.

Marseilleyî ard ziwan ke ey bi Şorişê Rojawanî têgêrayîşê azadîye şinasnayo û dima zî kitabê 'Konfederalîzmê Demokratîkî' yê Abdullah Ocalanî wendo. Marseilleyî vat: ''Nê kitabî dinyaya mi rê tesîr kerd. Ocalan teorîsyeno tewr girîng o. Paradîgmaya Ocalanî pêro teorîyanê verênan ra aver a. Paradîgmaya ey de çîyo tewr girîng caardişê yewîya pirrengîye yo. Na paradîgma vana ke ma eşkenê pîya biciwîyê.''

Marseilleyî bale ante Rayraşîyayîşê Enternasyonalîstan ser û vat: ''Seba ke ma wayîrê îdeolojîya hempare bîyê ma nê rayraşîyayîşî de kom bîyî. Naye ra pey zî ma do tim paştî bidê yewbînan. Ma do heta azadîya Abdullah Ocalanî şorê. Çîyêk nêeşkeno ma vindarno.''

Marseilleyî tecrîdê Îmraliyî sey bêhuqûqîye pênase kerd û vat: ''Tecrîdî ra ber tepişîyayîşê Ocalanî bi xo goreyê huqûqî nîyo. Hîrê serrî yo Ocalanî ra xeberêke nêna girewtene. Ocalan çend tecrîdkerde bibo zî firkê ey pêro dinya rê vila benê. Azadîya Ocalanî teyna seba azadîya kurdan û Kurdîstanî ney seba azadîya pêro bindestan girîng a. Ewropa û dezgehê sey CPTyî bi bêvengîya xo benê hemkarê tecrîdî.''