Kongreya Neteweyî ya Kurdistanî (KNK), 20’ê Nîsan a 2019’î de Zanîngehê Brukselî de bi slogana ‘Serra 21’ine ya esaretî de vîr fikirê Abdullah Ocalanî, alternatîfêk seba problemanê sîyasî û cimatkîyan’ konferansêk viraşt.

Çarçewaya konferansî de 3 panelî ameyî viraştene. Panelo yewin derheqê yewîya neteweyî ya şaranê Kurdistanî, panelo dîyin derheqê neteweyê demokratîkî û konfederalîzmê demokratîkî de û panelo peyên zî derheqê îlmê hemdemî yê Jîneolojî de bi.

Encamnameyê Konferansî

KNK’yî bi eşkerayîyêk encamnameyê konferansî eşkera kerd. Encamname de ame vîrardene rixmê esaretê fîzîkkîyî yê 21 serran fikir û vînayîşê Ocalanî, perspektîf û pêşnîyarê ê, paradîgmaya ê ya neteweyê demokratîkî ewro Rojakewtena Mîyanêne ra heta Amerîkaya Latîne û Afrîka mîyanê şaran de sey meşaleyêkê şênî vêşeno û xelqeya dorê fikirê ê her ke şino hîrayêr bena.

Heman wextî de ame vatene, “No têgêrayîşo newe yo Kurdistanî yo, serê nê paradîgma de, îhtîyacî bi wendişêkê cidî û munaqeşeyanê hîrayan esta. Verê her kesî lazim o ke Kurdistanijî bi xo ser o vinderê û terraqe bikerê. Çunke ewro tesîrê na paradîgma serê cimatê Kurdistanî de zêde yo.”

Tespît û Pêşnîyarê ke Konferans de Ameyî Kerdene

Netîceyê panelanê ke ameyî viraştene û munaqeşeyanê dimayê pêşkêşkerdişan de encamnameyêk ame eşkerakerdene. Çend netîceyê encamnameyê “Konferansê derheqê vîr û fikiranê Abdullah Ocalanî” yê ke ameyî eşkerakerdene nê yê:

*Kurdistan mîyanê prosesêkê tarîxî û kaotîkî ra ravêreno. Şarê Kurdistanî bi saya vîr û fikiranê Birêz Ocalanî bi rayîrê averberdişê yewîya mîyanêne û bi pêserardişê Kongreya Neteweyîye ya Kurdistanî eşkeno destkewteyanê xo bi azadîye tacîdar bikero.

*Seba averberdişê yewîya neteweyîye zî reyna îhtîyacî esta ke şaro Kurd xo û welatê xo mûsayîş û fehmanê dîn, bawerî, tarîx û felsefeya îşxalkaran ra bifeletno, çarçewa û perspektîfê ‘Cimatnasîya Azadîye’ de hişmendîya xo newe ra awan bikero.

*Babeta yewîya neteweyîye de nuqtayêka esasîye zî pawitişo meşrû yê şar û welatî yo. Herêmêka sey Rojakewtena Mîyanêne de û nê wextî de ke hêrişê modernîteya kapîtalîste û hêzanê îşxalkaran serê şarî de dewam kenê, pawitişo meşrû seba dewamkerdişê estbîyayîşî û kulturî esas o.

*Beşdarê konferansî îhtîyacî vînenê ke konferansê bi nê hawayî bêrê dewamkerdene û îdareyê KNK’yî ra yeno waştene ke nê karî ca û wareyanê bînan de zî tekrar bikero û bidomno.”