HDP do 7ê tebaxe de bi şîarê 'Çareserî ma yê. Şer û kolonyalîzmî rê nê' qezaya Kartalî ya Îstanbulî de mîtîngêkî bikero. Hemserekê HDPyî yê Îstanbulî Ferhat Encuyî derheqê babete de ANFyî rê qisey kerd.

Encuyî ard ziwan ke îqtîdarê AKP-MHPyî weçînayîşî ra verî hem wazeno weçinîtoxanê dormeyê xo biverdo, hem zî faşîzmî hîna mende bikero. Encuyî vat: ''Armanco esas ê pêvînayîşanê teberî yê Erdoganî hêrişê vera Rojawanî yo. Coka vera îşxal û hêrişanê nikayênan, vera israrê polîtîkaya şer û xîretê neweyî ganî ma tewirêkî bimojnê.''

Encuyî da zanayene ke vera polîtîkayanê teda înan zaf mîtîngî kerdî labelê vera israrê şerî ê do tewirê şar û HDPyî bimojnê. Encuyî vat: ''Hewteyêk o ma dest pê nê karî kerd û ma zaf xebitîyenê. Ma pêro qezayan de plansazîye kerde. Şar zî zaf eleqe mojneno. Ma hetê teknîkî ra amadekarîyê xo kerdî. Coka ma do mîtîngêkê xurtî bikerê.''

Hemserekê HDPyî yê Îstanbulî Ferhat Encuyî da zanayene ke krîz zaf bitesîr bîyo û vat: ''Vera krîzî tek çare şawitişê nê îqtîdarî yo. Ganî ma herinda nê îqtîdarî de îdareyêkê neweyî yê demokratîkî awan bikerê; ferasetê qedexeker, ferasetê şer û teda def bikerê. Bi na wesîle ez venga şarê ma dana ke 7ê tebaxe de saete 17.00 de Warê Kartalî yê Îstanbulî de vera nê ferasetî vengê xo berz bikero.''