Partîya Demokratîke ya Şaran (HDP) 6ê tebaxe de Meydanê Îstasyonî  yê Amedî û 7ê tebaxe de Kartalê Îstanbulî de bi şîarê 'Çareserî ma yê, şer û îşxalî rê ney' mîtîng organîze kerd. Semedê tewrbîyayîşê mîtîngan xebatî dewam kenê.

Çarçewa xebetanê mîtîngî de wekîlê HDPyî zî tede heyetî semedê tewrbîyayîşê mîtîngî dewe-dewe û keye-keye gerenê. Vizêr qezayan Çinar, Bismil,Sûr, Peyas û Rezan de xebatî ameyî kerdene. Wekîla HDPyî Felaknase Uca, Merale Daniş Beştaş, Remzîye Tosun, Huseyîn Kaçmaz,Sezaî Temelli û Dersime Dag tewrê xebatanê bîyî. HDPyijanê ke dewe û esnafî zîyaret kerdî raştê eleqeya şarî ameyî. Zîyaretan de wekîlan hêrişê vera Rojawan û Başûrê Kurdîstanî vist vîrî û vat ma pêro pîya tewrê mîtîngî bibê û vera şerî vengê xo berz bikerê.

Êlih de zî semedê tewrbîyayîşê mîtîngê Amedî  eşkerayîya çapemenîye ameye kerdene. Vervatoxa Meclîsê Cinîyan ê HDPyî Ayşe Acar Başarana ke eşkerayîye de qisey kerd vat ê do ameyoxê azadî înşa bikerî û veng da şarê bajarî ke wa tewrê mîtîngî bibo.

Îstanbul de semedê mîtîngo ke do 7ê tebaxe de Kartal de bêro kerdene xebatî dewam kenê. Çarçewaya tewrbîyayîşê mîtîngî de HDPyijan pîya bi wekîle Serpile Kemalbay bajar de broşurî vila kerdî.