Rêxistina HDPyî ya Amedî 6ê tebaxe de Warê Îstasyonî de bi şîarê 'Çareserî ma yê, şer û îşxalî rê ney' mîtîngêkî do bikera. Hemserekanê HDPyî yê Amedî Gulîstane Atasoy û Zeyat Ceylanî qezaya Yenîşehîrî de bînaya xo de kombîyayîşê çapemenîye kerd.

Wekîl Îmam Taşçier, Hemserekê HDPyî Gulîstane Atasoy û Zeyat Ceylan û endamê partîye beşdarê kombîyayîşî bîyî.

Hemserekê HDPyî yê Amedî Zeyat Ceylanî dîyar kerd ke mîtîngê înan seba prosesê sîyasîyî do bibo cewab. Ceylanî tecrîdê vera Rayberê Şarê Kurdî Abdullah Ocalanî vist vîrî û vat ke polîtîkaya AKP-MHPyî polîtîkaya tecrîdî ya. Ceylanî vat: ''Îqtîdar wazeno pê kurdan Lozanê diyînî bikero û bi hêrişanê kurdan û HDPyî wazeno ser bikewo. Ma tecrîd, hêriş, şer, îstîsmar û talanî qebul nêkenê. Ma do tim xo ver bidê. Ma do 6ê tebaxe de Warê Îstasyonî de biqîrê û şer û tecrîdî rê vajê 'nê'. ''

Hemsereka HDPyî ya Amedî Gulîstane Atasoy zî seba mîtîngî veng da û vat: ''Şer şerê şaran nîyo şerê AKP-MHPyî yo ke wazeno îqtîdarê xo rê dewam bikero. Vera şerî ma do reyna waran de bibê. Ma mîtîngêkê neweyî bikerê, ma pabeyê her kesî yê.''