Sekretaryaya herêma 63. ya Partîya Komunîste ya Fransan (PCF) şî serdana grevê vêşanîye yo ke seba wedartişê tecrîdê serê Rayberê Şarê Kurdî Abdullah Ocalanî Strasbourg de amebi destpêkerdene. Hemserekê KCDKyî Yuksel Koçî yo ke zîyaret de qisey kerd vat amacê înan şikitişê tecrîdê serê Rayberê Şarê Kurdî Abdullah Ocalanî yo.

 ‘FAŞÎZM BI MUCADELEYÊ PÎYAYÎ YENO BINFÎNAYENE’

Çalakwananê grevê vêşanîye ra parlamentera verêne ya HDPyî ya Riha Dîlek Ocalane zî ard vîrî ke waştişê keyeyê Ocalanî yê seba vînayîşê Ocalanî wextêko derg o nêno qebûlkerdene û vat ke tecrîd sûcê merdimîye yo û ganî CPT, KE û PE gureyê xo bica biyarê.

Grevkerdoxan ra Mehmet Nîmet Sevîmî bale ante ke bi perçekerdişê Kurdistanî netewe-dewletî ameyê awankerdene, naye ra sebebê tecrîdê girankerdeyî yê serê Ocalanî tena Tirkîya nêya, dewletê emperyalîstî zî hemparê nê tecrîdî yê.

‘MUCADELEYÊ ŞIMA, MUCADELEYÊ MA YO’

Christian Grosseyo ke serê nameyê Partîya Komunîste ya Fransan (PCF) de qisey kerd vat amacê înan ê nê zîyaretî tena paştîdayîşê seba çalakwananê grevê vêşanîye nêyo, heman wextî de paştîdayîşê şarê Fransî yo.

Grosseyî nê vatî: “Mucadeleyê şima, mucadeleyê ma yo. Seba serkewtişê nê mucadeleyê ganî ma rayapêroyîye ya Fransan qezenc bikerê.

Ganî ma ewro hemverê zextanê ke serê Kurdan de yenê kerdene vinderê, xora nasnameyê Partîya Komunîste de zî no esto. Eke ma nê mekerê xora Partîya Komunîste vatiş bêmana yo. Azadîya Ocalanî yena manaya cuya hempare û aşitîyane ya şaranê Rojakewtena mîyanêne.”